Фарғона вилоят прокуратураси Қува ва Фарғона туманларида 2018–2020 йиллар давомида 19,6 млн сўмлик бюджет маблағлари вафот этган фуқароларга пенсия сифатида тўлаб берилганини очиқлаганди.
Пенсия жамғармасининг Kun.uz’га билдиришича, вилоятда аниқланган ҳолат бўйича тегишли жазо чоралари қўлланилган. Жамғарма ижро этувчи раҳбарияти томонидан тизимда ишловчи ходимларга тушунтириш ишлари олиб борилган.
«Фарғона вилоят прокуратураси томонидан Бюджетдан ташқари пенсия жамғармаси вилоят бошқармаси, Қува ва Фарғона туман бўлимларида «Фуқароларнинг давлат пенсия таъминоти тўғрисида»ги қонун ижроси ўрганилган.
Ўрганишлар натижасида 2018–2020 йилларда пенсия тайинлаш комиссиялари томонидан ҳужжатлар тўлиқ ўрганилмагани туфайли бюджет маблағлари ортиқча сарфланган. Бюджетдан ташқари пенсия жамғармаси Фарғона вилоят бошқармаси, Қува ва Фарғона туман бўлимларида вафот этган фуқаролар номига 19,6 млн сўм пенсия тўлангани ва бошқа қонунбузилиш ҳолатлари аниқланган.
Мансабдор ва масъул ходимларга нисбатан тегишли жазо чоралари қўлланилган. Шунингдек, жамғарма ижро этувчи раҳбарияти томонидан тизимда ишловчи ходимларга тушунтириш ишлари олиб борилди», дейилади манба маълумотида.
Қайд этилишича, фуқаролар пенсия таъминоти билан боғлиқ коррупцион вазиятлар кузатилганда жамғармага мурожаат этишлари керак.
Аввалроқ, Бюджетдан ташқари пенсия жамғармаси Фарғона вилоят бошқармаси, Қува ва Фарғона туман бўлимларида вафот этган фуқаролар номига 19,6 млн сўм пенсия тўлангани ва бошқа қонунбузилиш ҳолатлари аниқлангани тўғрисида хабар берилганди.
Эслатиб ўтамиз, «Фуқароларнинг давлат пенсия таъминоти тўғрисида»ги қонуннинг 63-моддасида пенсионернинг вафоти муносабати билан олинмай қолган пенсияни тўлаш ва дафн этиш учун нафақа тўлаш тартиби келтирилган.
Пенсионер вафот этган тақдирда унинг оиласига ёки пенсионернинг дафн маросимини ўтказган шахсга пенсияни ҳисоблаш базавий миқдорининг тўрт баробари миқдорида дафн этиш нафақаси тўланади.
Жамғармага кўра, 2020 йилда президент фармони билан 16 мингдан ортиқ пенсионер 25 млрд сўмлик ортиқча тўловни тўламайдиган бўлган эди. Бунда ортиқча тўловларнинг амалга оширилишига бир неча омиллар сабаб бўлади. Хусусан, техник хатолар рўй бериши, фуқаролар сохта ҳужжатлар олиб келган бўлиши, архивда сохта ҳужжатни тасдиқлаб бериш ҳолатлари ҳамда вафот этган фуқаролар пенсиялари тўлаб юборилган бўлиши мумкин.
Қайд этиш керак, президентнинг март ойидаги фармони билан вафот этган фуқароларга пенсия тўлаш тизимига ўзгартириш киритилди.
Эндиликда фуқароларга ўлим ҳақидаги гувоҳнома олгандан сўнг шу куннинг ўзида «Халқ банки»нинг исталган филиалига бориб, бир марталик дафн нафақасини олиш имконияти яратилди.
Бугунги кунда ҳар битта ФҲДЁ органида «Халқ банки»нинг сайёр кассалари бор. Фуқаролар гувоҳнома олгач, ўша жойнинг ўзида бир марталик дафн нафақасини олишлари мумкин бўлади.
Шунингдек, ФҲДЁ органида электрон шаклда ўлим қайд қилингандан сўнг Пенсия жамғармаси аҳоли ва унинг яқинлари келмаса ҳам бир иш кунида унга тегишли дафн пули расмийлаштирилишини таъминлайди.
