Навоийда коммунал хизматлар учун аҳолидан ундирилган пулларни талон-торож қилган ширкат раҳбарига нисбатан жиноят иши қўзғатилди. Бу ҳақда Бош прокуратура ҳузуридаги иқтисодий жиноятларга қарши курашиш департаменти хабар берди.
Маълум қилинишича, департаментнинг Навоий вилоят бошқармаси томонидан вилоят «Ягона ҳисоб-китоб маркази» мурожаатига асосан терговга қадар текширув ўтказилган.
Текширув давомида «Қ.К.» хусусий уй-жой мулкдорлари ширкати раҳбари Х.Қ. ва бошқалар ширкатга қарашли 17 та кўп қаватли уйда яшовчи аҳолидан 2020 йилда уй-жой коммунал хизмати учун йиғилган 201,5 миллион сўм нақд пулни ўзлаштириш йўли билан талон-торож қилганликлари аниқланган.
Ҳолат юзасидан Жиноят кодексининг 167-моддаси (талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Олдинроқ Навоийда аҳолига ажратилган суюлтирилган газни талон-торож қилган мансабдор шахслар ушланганди.
