Тадбиркор электр таъминотидаги узилиш сабаб 6800 евро йўқотди: у кийикларни эмлаш учун шунча нархга хориждан олиб келган вакциналар яроқсиз ҳолга келиб қолди.
Тошкент вилоятининг Бўстонлиқ туманида, 98 гектар ҳудудда юздан ортиқ кийик ва буғулар боқилмоқда.
«Corrida Food» оилавий корхонаси Австрия ва Словениядан кийиклар олиб келиб, ферма ташкил этгани ҳақида Kun.uz 2020 йил кузида мақола эълон қилган эди:
Марказий Осиёдаги ягона кийикчилик фермаси ҳақида юқоридаги ҳавола орқали батафсил маълумот олишингиз мумкин. Бугун эса биз ушбу тадбиркор дуч келган муаммо ҳақида сўз юритмоқчимиз.
Бизга мурожаат қилган корхона иш юритувчиси Баҳодир Худойбердиевнинг сўзларига кўра, кийиклар куз ва баҳорда махсус вакцина билан эмлаб турилади. У шу мақсадда 112та кийикка етадиган вакцинани 6800 еврога сотиб олишганини айтди.
«Бу кийиклар ёшлигидан шу вакцина билан эмлаб келинган. Биз кийикларни 2-4 ёшлигида олиб келганмиз, бунгача улар ҳар йили 2 марта худди шу вакцинани олиб туришган.
Вакцина ўзгармас ва паст ҳароратда, музлаткичда сақланиши керак. Биз уни жума куни хориждан олиб келтирган бўлсак, электр узилишлари бўлгани сабаб шу куннинг ўзига режалаштирган эмлашни амалга ошира олмадик.
Генераторимизни ишлатиб турдик, лекин афсуски, кейинги кунлар – шанба ва якшанбада ҳам бу узилишлар барҳам топмади. Шу сабабли вакцина яроқсиз ҳолга келиб қолди.
6800 еврога сотиб олинган вакцинани ташлаб юбормаслик учун, ёмон бўлиб қолганига қарамай, мутахассислар билан гаплашиб, бир эркак ва бир урғочи кийикда синаб кўрдик. Лекин бу уларга анча ёмон таъсир қилди, уч кун деганда оёққа қўйиб олдик.
Энди 112та кийик учун бошқатдан вакцина сотиб олишга мажбурмиз», – дейди Баҳодир Худойбердиев.
Ҳолат юзасидан Бўстонлиқ ҳудудий электр тармоқлари корхонаси раҳбари Қурбонали Сиддиқов билан телефон орқали боғландик.
«Биз уларнинг токини ўчирмаганмиз, авариявий ўчиш бўлган. Сабаби, бу ҳудудда одамлар дам олиш кунлари келиб, варрак учиради. Варраклар электр симларига ўралиб қолади, ўралиб қолган варракни тортишганида симлар бир-бирига тегиб, туташув бўлади ва шу линияга тегишли подстанция ўчиб қолади. Авариявий ўчишнинг сабаби шу.
Айнан дам олувчилар келадиган шанба-якшанба кунлари шундай бўлади. Бориб, варракни олиб ташлаб, электр таъминотини тиклаймиз. Симга ўралиб қолган варракни ходимларимиз олиб ташлаётганини видеога ҳам олиб қўйганмиз.
Қолаверса, бизнинг линиямиз 6 км бўлса, унга уланган уларнинг алоҳида ўз линияси бор, яъни абонент линияси. Бизнинг линиямизда туташув бўлса, бартараф қиламиз, лекин агар уларнинг линиясида муаммо бўлса, биз уни ажратиб қўямиз.
Уларнинг ҲЭТК билан шартномаси йўқ. Линиясини таъмирлашимиз учун биз билан шартнома қилиб, ҳисобимизга пул тушириб берса, ходимларимиз бориб таъмирлаб беради. Уларнинг шахсий трансформатори бор, лекин унинг ҳужжати тўлиқ эмас. Ҳужжатлари чала қилинган: трансформаторнинг рақами йўқ, надзордан рухсат олинмаган, тегишли буйруғи чиқмаган. Трансформатор ноқонуний уланган.
Ҳужжатини тўғирлаш учун бизга мурожаат қилмаган. Ҳужжатларини қачондир қайсидир фирмага қилдириб, охирига етказмаган. 2018 йилда қурилиш даврига деб 1 ойга рухсатнома билан электрни ёқтириб олиб, шу билан трансформаторни ўчирмаган. Қурилиш даврига деб, 1 ойга рухсат олган», – деди Бўстонлиқ ҲЭТК раҳбари.
Ўз навбатида, «Corrida Food» иш юритувчиси Баҳодир Худойбердиев корхонанинг электр таъминоти билан боғлиқ барча ҳужжатлари жойида экани, аксинча, ҲЭТКдагилар бу ҳужжатларни топа олмаётганини айтди.
«2018 йилда лойиҳа қилганмиз, рухсатномалар олганмиз, «тех-условия» расмийлаштирганмиз, якунда шартнома ҳам қилганмиз. Буларнинг ҳаммаси иккитадан нусхада қилинган, нусхалардан бири ҲЭТКда қолган. Лекин ҳозир булар мендан сўрашяпти: «Ҳужжатларни беринг, нусха қилиб олайлик», деб.
Ҳатто трансформатор пунктимизнинг рақамини ҳам билишмайди. Ўзлари ўрнатиб, шартнома қилиб кетишган, лекин рақамини билишмайди», – дейди у.
Тадбиркор ҳамма ҳужжатлари жойида эканини такрорлар экан, ойма ой барча тўловлар ўз вақтида тўлаб борилишини қўшимча қилди.
Мақоламиз сўнгида, гарчи бўлар иш бўлган, тадбиркор бир неча минг долларга зарар кўрган бўлса-да, ҳолат такрорланмаслиги учун юқори турувчи мутасаддиларни муаммога эътибор қаратишга чорлаб қолган бўлар эдик.
Хусусан, «Ҳудудий электр тармоқлари» АЖ масалани ўрганиб, тадбиркорнинг муаммосини ҳал этишга кўмаклашиши мақсадга мувофиқ, назаримизда.
Бобур Акмалов,
Kun.uz мухбири.
Тасвирчи – Дониёр Якубов.
