АҚШда собиқ фармацевт 2020 йил охирида Moderna компаниясининг коронавирусга қарши 500 доза вакцинасини қасддан яроқсиз ҳолга келтиргани учун 3 йиллик қамоқ жазосига ҳукм қилинди.
46 ёшли Стивен Бранденбург февралда ўзгалар ҳаётини хавф остига қўйиб, истеъмол товарини сохталаштиришга уринганликда ўзини айбдор деб тан олган.
Суд Бранденбург Moderna вакцинаси солинган флаконларни шифохонадаги кечки навбатчилик вақтида музлаткичдан атайлаб олиб, уларни яроқсиз ҳолга келтирган деб топган. Айбланувчининг таъкидлашича, у вакциналарга шубҳа билан қараган ва бу борадаги фикрларини ўз ҳамкасбларига айтган.
Moderna вакцинаси ўз самарадорлигини йўқотмаслиги учун маълум даражадаги совуқ ҳароратда сақланиши лозим.
Бранденбург ҳар куни вакциналарни бир неча соат ташқарида ушлаб тургач, кейин уларни эртаси куни ишлатишлари учун яна музлаткичга қайтарганини тан олган. Унинг бу қабиҳ иши фош бўлгунга қадар 57 киши ушбу яроқсиз вакциналар билан эмлангани аниқланган.
Собиқ фармацевт судья унга ҳукм чиқариши олдидан ўз қилмиши учун кечирим сўраган.
«Менинг бундай қарор қабул қилишга ҳаққим йўқ эди», деб айтган Бранденбург ва «ўз қилмишидан пушаймонлигини ҳамда уялаётганини» айтган.
