Тошкентда «1 сўм» қийматда давлат объектини олиб беришини айтиб, навоийлик фуқародан 6000 АҚШ доллари олган шахс ушланган. Ҳозирда мазкур шахсдан жабрланган бошқа фуқароларни аниқлаш бўйича суриштирув олиб борилмоқда. Бу ҳақда ИИВ Киберхавфсизлик маркази хабар бермоқда.
Маълум қилинишича, Сергели туманида яшовчи, муқаддам бир неча бор фирибгарлик жиноятини содир этганлиги учун судланган, 1962 йилда туғилган Ю.У. давлат мулки объектларни «1 сўм» қийматида онлайн аукцион савдолари орқали олиб беришни ваъда қилиб, одамлардан пул олгани учун ушланган.
Жумладан, Ю.У. Навоий вилоятида яшовчи,1988 йилда туғилган З.С.нинг ишончига кириб, биржа савдолари орқали Тошкент шаҳри ҳудудидан давлат объектини олиб беришни айтиб, ундан 6 000 доллар пулларни олиб, ўз эҳтиёжларига сарфлаб юборгани аниқланган.
Қайд этилишича, ўтказилган терговга қадар текширув ҳаракатлари давомида Ю.У. қилган ишидан пушаймонлигини билдириб, ўз айбига тўлиқ иқрорлиги тўғрисида кўрсатма берган.
Таъкидланишича, мазкур ҳолат юзасидан 2021 йил 27 июнь куни Тергов органи томонидан Ю.У.га нисбатан Жиноят кодексининг 168-моддаси 2-қисми «а» банди билан жиноят иши қўзғатилиб, дастлабки тергов ҳаракатлари ўтказилмоқда. Шунингдек, гумонланувчи Ю.У.дан жабрланган фуқароларни аниқлаш бўйича суриштирув тадбирлари олиб борилмоқда.
