Ўзбекистонлик икки теннисчи - Темур Исмоилов ва Амал Султонбековлар келишилган ўйинларда қатнашгани учун дисквалификация қилинди. Бу ҳақда Теннисда ҳалолликни таъминлаш бўйича халқаро агентлик (ITIA) хабар бермоқда.
Дисквалификация муддати 21 июлдан кучга кирди. Қайд этилишича, гап 2019 йилги турнирлардан бирида рўй берган келишилган ўйин ҳақида кетмоқда.
Темур Исмоилов теннис бўйича мусобақалардан умрбод четлаштирилди ва 14 минг доллар миқдорида жаримага тортилди, Султонбеков эса 2021 йил 21 июлдан 2026 йил 21 июлгача четлаштирилди ва 8 минг доллар миқдорида жарима тўлайдиган бўлди. Ушбу спортчиларнинг ҳар қандай теннис мусобақаларида қатнашиши ёки уларга ташриф буюриши тақиқланади.
Маълумот учун, Темур Исмоиловнинг ATP рейтинги энг юқори кўрсаткичи 397-ўрин бўлган, Султонбековда эса - 1886-поғона.
