AҚШ ҳукумати коронавирусга қарши тўлиқ эмланган чет элликларгагина мамлакатга кириш учун рухсат беришни режалаштирмоқда. Бу ҳақда Reuters, The New York Times, CNN ва бошқа оммавий ахборот воситалари президент Жо Байден маъмуриятидаги манбага асосланиб хабар бермоқда.
Янги қоидаларда, шунингдек, AҚШга кириш учун коронавирусга қарши эмланишига ҳожат бўлмаган одамлар тоифалари рўйхати ҳам келтирилган. Meduza’нинг ёзишича, бу истиснолар нималардан иборатлиги ҳозирча номаълум. Нашр истисноли ҳолатлар озлигини маълум қилган.
Қайд этилишича, янги қоидалар мамлакатда эпидемиологик вазият яхшиланганидан кейин кучга киради. Уларни қачон жорий этиш режалаштирилгани ҳозирча аниқ эмас. Июль ойи охирида Оқ уй Қўшма Штатларга киришда ўрнатилган чекловлар дунёда коронавируснинг дельта штамми тарқалаётгани туфайли ҳозирча сақланиб қолишини маълум қилганди.
Энди чет элликлар ҳам, мамлакатга қайтаётган AҚШ фуқаролари ҳам коронавирус инфекциясини юқтирмаганликларини тасдиқловчи тест жавобига ёки касалликка чалиниб тузалиб чиққани ҳақидаги COVID-19 сертификатига эга бўлиши керак. AҚШга қуруқлик чегаралари орқали киришга фақат ўта зарурий ҳоллардагина рухсат берилади.
Сўнгги икки ҳафта ичида Хитой, Эрон, Ҳиндистон, Бразилия, Жанубий Aфрика, шунингдек, Буюк Британия, Ирландия ва Шенген давлатларида бўлган чет элликларнинг АҚШга кириши тақиқланган.
