Истеъфодаги турк генерали Эрдўған Қорақуш Греция билан жанговар тўқнашувлар юз бериши ҳолатига Анқаранинг ҳарбий режасини ошкор қилди.
CNN Turk телеканалидаги сиёсий дебатлар давомида Қорақуш Афина билан ҳарбий можаро юз бергудек бўлса, Анқара Грециянинг йириклиги бўйича иккинчи шаҳри — Салоникига зарба беришини айтган.
У Греция АҚШ иттифоқдоши сифатида ўз ҳудудини АҚШнинг 20та ҳарбий базасини жойлаштириш учун тақдим қилганини эслатиб ўтган. Бундай базалардан Туркияга энг яқини Александруполис шаҳрида жойлашган. Генералнинг таъкидлашича, ушбу база турк армиясининг қуруқликдаги амалиётига қаршилик кўрсатиш учун тўлиқ тайёр ва барча зарурий воситалар билан таъминланган.
Қорақушнинг айтишича, можаро ҳолатида Афина Туркиянинг Европадаги қисми ва энг йирик шаҳри — Истанбулни босиб олишга ҳаракат қилади.
Август охирида Греция осмонида Туркиянинг иккита қирувчи самолёти кузатилган. ОАВ маълумотларига кўра, турк ҳарбий самолётлари мунтазам равишда Греция ҳаво чегарасини кесиб ўтади ва Греция ушбу самолётларни сиқиб чиқариш учун бунга жавобан ўз самолётларини ҳавога кўтаради.
Икки давлат ўртасидаги зиддият 2020 йилда Анқара Шарқий Ўрта Ер денгизида сейсмик-қидирув ишларини олиб боришини эълон қилгани сабабли янада кескинлашганди. Афинанинг фикрича, Туркия бундай ишларни олиб боришда Грециянинг сув чегараларини бузади.
Ўз навбатида, апрелда Туркия Греция, Исроил ва ЕИга норозилик нотаси жўнатиб, унда ушбу давлатлар EuroAsia Interconnector лойиҳаси доирасида ташкил этаётган электр тармоғи Туркия сув ҳудудлари орқали ўтишини айтган.
