Португалия чемпионатининг 12-туридан ўрин олган «Белененсеш» — «Бенфика» ўйини тўхтатилди.
Видеодан кадр
Клубда авж олган коронавирус пандемияси туфайли ўйинни 9 киши (6 дебютант, ўнг қанот ҳимоясида дарвозбон ўйнади) билан бошлаган «Белененсеш» танаффусга 0:7 ҳисобида чиқиб кетди. Футболчилар иккинчи бўлимда майдонга тушишни исташмади. Бироқ ўйин давом эттирилиши керак бўлган вақтдан 20 дақиқа ўтиб, мезбонлар 7 киши бўлиб майдонга қайтишди.
2 дақиқада сўнг «Белененсеш» футболчиларидан бири жароҳат олиб, ўйинни давом эттира олмаслигини маълум қилди. Регламентга кўра, 6 футболчи билан ўйнаш мумкин бўлмагани учун ҳакам баҳсни тўхтатди.
