Қайд этилишича, ўқиш бошлангунига қадар университетларни молиялаштириш, қизлар учун махсус аудиториялар ташкил этиш ва уларга таълим берадиган ўқитувчиларни ишга қабул қилиш масалаларини ҳал қилиш лозим.
Афғонистондаги олий ўқув юртлари иқтисодий инқироз сабабли очилмайди. Бу ҳақда Hindustan Times газетаси хабар берди.
"Олийгоҳлар очилиши учун кўп вақт талаб этилади. Ўқиш бошлангунига қадар университетларни молиялаштириш, қизлар учун махсус аудиториялар ташкил этиш ва уларга таълим берадиган ўқитувчиларни ишга қабул қилиш масалаларини ҳал қилиш лозим", - дея Афғонистон таълим вазири Абдулла Боқи Ҳаққонийнинг сўзларидан иқтибос келтиради газета.
Вазирнинг сўзларига кўра, Афғонистондаги таълим жараёни гендер мансублик бўйича ташкил этилади: йигитларни эркак ўқитувчилар, қизларни аёл ўқитувчилар ўқитади. Йигитлар ва қизлар алоҳида ҳолда ўқийди.
Аввалроқ “Толибон” Афғонистондаги университетлар фаолияти яқин вақт ичида тикланишини билдирганди.
