22:07 / 14.09.2022
21717

Россия Харкивдаги мағлубиятдан кейин тинчлик музокараларини тиклашга уринмоқда – Украина расмийси 

Охирги ҳафтада Украина армиясининг кескин ҳужумлари натижасида Россия қўшинлари Харкив областини ташлаб чиқишга мажбур бўлди. Шунингдек, улар Херсон областидаги позицияларини ҳам бой бермоқда. 

Фото: Rob Lee / Twitter

Сўнгги кунларда россиялик сиёсатчилар украиналик ҳамкасблари билан бир неча марта алоқага чиқди ва тинчлик музокараларини қайтадан бошлашга чақирди. Бу ҳақда Украина бош вазирининг Европа ва Евроатлантика интеграцияси бўйича ўринбосари Олга Стефанишина айтди

«Россиялик шахсларнинг турли расмий гуруҳлари томонидан музокараларни тиклаш учун очиқ ва парда ортидан уринишлар бўлди. Аммо Россия бизнинг ҳудудимизда амалга оширган ва ҳар ойда амалга оширишда давом этаётган жиноятларнинг оғирлигини ҳисобга олганда, музокаралар ричаги февралдагидан фарқ қилади», — деди у. 

Стефанишина Украина «энг оғир сценарий»га тайёрлангани, аммо дош берганини таъкидлади. У шунингдек, Донбасс ва Қрим Украина назорати остига ўтишига умид билдирди.

Аввалроқ Reuters агентлиги Россия Украинага бостириб кирганидан кейин озгина вақт ўтиб президент маъмурияти раҳбари ўринбосари Дмитрий Козак президент Владимир Путинга Киев билан НАТОга кирмаслик тўғрисида келишувга эришгани ва урушни давом эттиришга ҳожат йўқлигини айтгани тўғрисида ёзганди. Агентликнинг қайд этишича, Путин сўнгги дамда қўшимча ён беришларни талаб қилган, натижада келишув барбод бўлган.  

Россия президенти матбуот котиби Дмитрий Песков бу хабарни рад этди.

«Бунинг воқеликка ҳеч қандай алоқаси йўқ. Бундай воқеа асло бўлмаган», - деди у.

Охирги ҳафтада Украина армиясининг кескин ҳужумлари натижасида Россия қўшинлари Харкив областини ташлаб чиқишга мажбур бўлди. Шунингдек, улар Херсон областидаги позицияларини ҳам бой бермоқда. Украина қўшинлари 6 минг квадрат километр ҳудудда жойлашган бир неча юз аҳоли масканларини ўз назоратига қайтариб олди.  

Россия ва Украина ўртасидаги музокаралар март бошларида тўхтатилганди. 

4 сентябр куни Дмитрий Песков Москва Киев билан музокараларга тайёрлигини, лекин гап фақат Россиянинг уруш бошидан бери ўзгармай келаётган талаблари бажарилиши ҳақида боришини айтди. 

Мавзу
Россия-Украина уруши
2022 йил 22 феврал куни Россия Украина чегарасидан ўтиб, қўшни мамлакатга бостириб кирди. Украина армияси жанг таклиф қилди.
Барчаси
Top