Украинада жанг қилганларнинг тўртдан бир қисми худди шу моддалар бўйича судланганларнинг кўпчилиги билан бир хил жазо турини олди, деб ҳисоблаб чиқди «Важные истории».
Россия ҳарбий судлари Украинадаги жангчиларга одатдагидан енгилроқ жазо тайинлаяпти. Бу ҳақда 18 ноябрь, жума куни Россиянинг "Верстка" ва "Важные истории" нашрлари хабар берди.
Журналистлар гарнизон судларининг веб-сайтларида Россия ҳукумати Украинага бостириб киришни таърифлаганидек - «махсус ҳарбий операция» ҳақида сўз юритилган ҳукмларни излашди. «Биз фақат урушда қатнашиш жазони енгиллаштиришга таъсир қилган деб даъво қила олмаймиз, чунки ишларда бошқа енгиллаштирувчи ҳолатлар ҳам бор. Биз уруш қатнашчилари олган жазо турлари ва кўламини суд томонидан 2021 йилда худди шу моддалар бўйича судланган кўпчиликка тайинланган жазолар билан солиштирдик», — дея аниқлик киритади "Важные истории".
Суриштирув муаллифларининг таъкидлашича, фақат чорак ҳолларда Украинада жанг қилганлар худди шу моддалар бўйича судланганларнинг аксарияти билан бир хил жазо олган.
Судлар аниқланган 80 та ҳукмнинг 60 дан ортиғида урушда қатнашишни енгиллаштирувчи ҳолат сифатида кўриб чиққан. Яна тўққиз киши фронтга кетиш истагини билдирган ёки рус армияси фойдасига пул ўтказган ҳолда енгиллаштириш олган. Ўз-ўзидан бу қонунни бузмайди, дейди «Русь Сидящая» ҳуқуқни ҳимоя қилиш ташкилоти адвокати Алена Савельева.
«Жазони енгиллаштирувчи ҳолатлар рўйхати очиқ, яъни суд «ички ишончига кўра» судланувчининг шахсига оид маълум фактларни ҳисобга олиши ёки эътиборга олмаслиги мумкин. Судлар кўпинча, масалан, хайрия фаолиятида иштирок этишни ҳисобга олади. Бу ерда эса, гап бутун бир «қутқарув» операцияси ҳақида борган. Яна бир савол: улар бошқа айбланувчиларга қараганда анча енгилроқ жазога ҳукм қилинадими? Бу Жиноят кодексининг асосий тамойилларига зиддир: адолат ва барчанинг олдида тенглик», - дея ҳуқуқшунос суриштирув натижаларига изоҳ берди.
«Важные истории»да уруш майдонидан қайтганлар кўпинча спиртли ичимликларни истеъмол қилиб жиноят содир этишини қайд этган.
Алена Савельеванинг таъкидлашича, кўплаб уруш фахрийлари уйга қайтганидан кейин травмадан кейинги стресс ва бошқа психологик жароҳатларни бошдан кечиришади. Бу жамиятда жиноятчиликнинг кўпайишига олиб келиши мумкин. «Мана энди бизда улар учун шундай «ажойиб» суд амалиёти мавжуд. Қулай», - деди истеҳзо билан Савельева.
"Важные истории" таҳлил қилган ҳукмлардан бирида Белгород вилоятидан бўлган Руслан Кудинов учун жазо қисқартирилган. Гарчи у ҳарбий бўлмаса-да, суд эркакнинг Украина билан чегарадош минтақада яшашини ҳисобга олди.
«Урушда иштирок этишни истамаганлар учун «махсус операция» суддаги ҳолат сифатида қарама-қарши йўналишда ишлайди», деб таъкидлайди журналистлар. Улар ҳарбий хизматдан бўйин товлаш ва бўлинмани ўзбошимчалик билан тарк этиш, шунингдек, қурол билан муомала қилиш қоидаларини бузиш, ўғрилик, талончилик ва товламачилик ҳолатларини мисол тариқасида келтирмоқда. Шу билан бирга, агар бирор киши жанговар ҳаракатларда қатнашишдан бош тортмаса, у сўроқсиз ҳарбий хизмат жойини ташлаб кетиш бўйича анча енгилроқ жазога - ҳақиқий жазо ўрнига шартли жазога, жаримага ёки хизматдаги вақтинчалик чекланишга дуч келиши мумкин.
