Литва Европа Иттифоқини уч Болтиқбўйи мамлакати портларидан Украина донини экспорт қилиш учун фойдаланишга чақирди.
AFP ахборот агентлиги томонидан танишиб чиқилган, Литванинг уч вазирлари томонидан имзоланган ва Европа комиссиясига йўлланган мактубда айтилишича, Болтиқбўйи портлари Украина қишлоқ хўжалиги маҳсулотлари, жумладан, ғалла транзити учун «ишончли муқобил вариант»га айланиши мумкин.
Мактубда айтилишича, Болтиқбўйи мамлакатлари йилига 25 миллион тонна ғалла ташишда ёрдам бериши мумкин.
Россия президенти Владимир Путиннинг сўзларига кўра, Россия «Украина ғалласини ҳам тижорат, ҳам бепул асосда алмаштириши мумкин». Бу ҳақда у Кремль сайтида чоп этилган мақоласида ёзган ва бу йил «рекорд ҳосил кутилаётганини» қўшимча қилган.
Путин Украина портларидан озиқ-овқат экспорт қилиш бўйича «ғалла битими»ни «инсонпарварлик мақсадини оқлай олмади» деб атади ва унинг давом этиши «ўз маъносини йўқотди» деб таъкидлади.
18 июлда муддати тугаган «ғалла битими»дан чиққанидан сўнг, Россия Украина жанубини, жумладан Одессани ўққа тутишни кескин оширди. Шу билан бирга, айрим таҳлилчиларнинг фикрича, Москва дастлаб келишувни узайтириш ниятида бўлмаган.
