Фарғонада ўтказилаётган саралаш турнирида миллий жамоа муваффақиятли иштирок этди.
Футзал бўйича Ўзбекистон миллий жамоаси 2024 йилги Осиё Кубоги финал босқичида иштирок этади.
Фарғонада ўтказилаётган саралаш турнири гуруҳ босқичи 2-турида ўзбекистонликлар Малайзия миллий жамоасини 4:3 ҳисобида мағлуб этишди. Натижада, Ўзбекистон миллий жамоаси 2 ўйиндан сўнг 6 очко жамғариб, Осиё Кубоги йўлланмасини қўлга киритди. 1-турда ўзбекистонликлар Камбожа устидан 6:1 ҳисобида ғалаба қозонган эди.
Якуний турда Ўзбекистон ва Ироқ миллий жамоалари баҳслашади. Ироқликлар ҳам 6 очко билан аллақачон Осиё Кубоги йўлланмасига эга бўлган. Икки жамоа ўйини фақат гуруҳ ғолибини аниқлаб беради.
2024 йилги Осиё Кубоги 17-28 апрел кунлари Таиландда ўтказилади. Мусобақа 2024 йил сентябр-октябр ойларига режалаштирилган Жаҳон Кубогига саралаш турнири вазифасини ҳам бажаради. Мусобақанинг энг яхши 4 та жамоаси «мундиал» йўлланмасига эга бўлади.
2024 йилги Жаҳон Кубоги Ўзбекистонда ўтказилади. Шу боис Ўзбекистон миллий жамоаси Осиё Кубогида қандай натижа кўрсатишидан қатъи назар, мезбон сифатида ушбу турнирда иштирок этади.
