АҚШ Ғарбий Европадаги ўнга яқин консуллигини ёпишни режалаштирмоқда

АҚШ Давлат департаменти штатларни қисқартириш доирасида Ғарбий Европадаги ўнга яқин консуллигини ёпишни режалаштирмоқда. Бу ҳақда Reuters агентлиги америкалик амалдорлар орасидаги манбаларига таяниб хабар берди.

Хусусан, АҚШнинг Ҳамбург, Дюсселдорф, Лейпциг, Бордо, Лион, Страсбург ва Флоренциядаги дипломатик миссиялари ёпилиши кутилмоқда. Агентликнинг ёзишича, ушбу режалар ҳали ўзгариши ҳам мумкин.

Давлат департаменти, шунингдек, Туркия шарқидаги Газиантеп шаҳрида жойлашган консуллигини ёпиш режаси ҳақида конгрессни хабардор қилган. Ушбу консуллик орқали Вашингтон Сурия шимолига гуманитар ёрдамларини кўрсатиб келган.

Трамп маъмурияти бюрократик харажатларни камайтириш мақсадида АҚШнинг бутун дунё бўйлаб дипломатик иштирокини қисқартиряпти. Танқидчилар бу каби ҳаракат Америка етакчилигига путур етказиши, шунингдек, Хитой ёки Россия каби АҚШнинг геосиёсий рақиблари бундан фойдаланиши мумкин деб ҳисобламоқда.

Феврал ўрталарида АҚШ ва Россия вакиллари ўртасида ўтказилган учрашувдан кейин дипломатик миссиялар фаолиятини ўзаро тўлиқ тиклашга қарор қилинган эди. Американинг Москвадаги элчихонаси штати ўнлаб ходимларга оширилади.

Давлат депаратментининг бутун дунё бўйлаб жойлашган 270 дан ортиқ дипломатик миссиясида фаолият юритаётган ходимларининг умумий сони қарийб 70 минг кишини ташкил этади. Уларнинг қарийб 45 минг нафари — бу маҳаллий ходимлар, 13 минг нафари — дипломатик хизматлар ходимлари бўлса, 11 минг нафари давлат хизматчиларидир.