Бангладешда тартибсизликлар: ўнлаб киши ҳалок бўлган, юзлаб киши яраланган, биноларга ўт қўйилган

Июл ойи бошидан буён Бангладешнинг турли шаҳарларида хусусий ва давлат олий таълим муассасаларининг юзлаб талабалари иштирокидаги намойишлар давом этмоқда. Улар давлат секторидаги иш ўринларининг 30 фоизи 1971 йилги Покистонга қарши озодлик уруши қатнашчиларининг қариндошлари учун ажратилган квоталар тизимини ўзгартиришни талаб қилишмоқда. Намойишчилар давлат лавозимлари тақсимланиши тизимини адолатсиз деб ҳисобламоқда — бу айниқса иқтисодий муаммолар ва 170 миллионлик аҳолининг бешдан бир қисмини ташкил этадиган ёшлар орасидаги юқори ишсизлик фонида яққол кўзга ташланмоқда.

Намойишлар бош вазир Шайх Ҳасиннинг «Авами лигаси» партиясининг талабалар қаноти аъзолари — квоталар тизими сақлаб қолиниши тарафдорлари билан келиб чиққан тўқнашувлардан кейин тартибсизликларга айланиб кетди. Намойишчиларни тарқатиш учун полициячилар ва ҳарбийлар жалб этилган. Улар кўздан ёш сиздирувчи газ ва резина ўқлар қўллаган. Маҳаллий расмийларга кўра, намойишчилар бунга жавобан BTV давлат телекомпанияси биноси ҳамда полиция участкасига ўт қўйиб юборган.

Шифокорлар маълумотига кўра, бир неча кундан буён давом этаётган тартибсизликлар оқибатида бутун мамлакат бўйлаб камида 50 киши ҳалок бўлган. Яна беш юзга яқин киши жароҳатланган. Қурбонлар ва яраланганларнинг аниқ сони ҳозирча маълум эмас. Мамлакатда амалда интернет ва телефон алоқаси ишламаяпти, маҳаллий нашрлар ва телеканаллар қарийб янгилик тарқатмаяпти.