АҚШ ва Британия Россиядан металл импортини тақиқлади

Британия АҚШдан кейин Россия алюминий, мис ва никел импортига эмбарго жорий қилди. 12 апрел, жума куни эълон қилинган АҚШ Молия вазирлиги ва Британия ҳукумати веб-сайтларидаги баёнотларга кўра, Чикаго ва Лондондаги биржаларда ушбу металлар билан савдо қилиш тақиқланади. АҚШ Молия вазирлигининг аниқлик киритишича, чекловлар тақиқ кучга киргунга қадар қазиб олинган металларга тааллуқли эмас.

Россия дунёда никелнинг тахминан 6 фоизи, алюминийнинг 5 фоизи ва миснинг 4 фоизини ишлаб чиқаради. Bloomberg қайд этишича, Лондон металл биржаси (LME) омборларида 2024 йилнинг март ойи охири ҳолатига кўра, Россия алюминийи захираларнинг 96 фоизини, никел – 62 фоизини ва миси – 36 фоизини ташкил қилган. Британия ҳукумати ҳисоб-китобларига кўра, Россиянинг Украинага кенг кўламли ҳужуми ортидан металл экспортидан тушган даромади 25 миллиард доллардан 15 миллиард долларгача камайган. Қабул қилинган чора-тадбирлар ушбу миқдорни камайтиришга қаратилган.

Евроиттифоқ РФдан металларга нисбатан санкциялар киритишга шошилмаяпти 

Шу билан бирга, Россия Федерациясидан металл импорти Россия ва Европа Иттифоқи ўртасидаги савдонинг асосий йўналишларидан бири бўлиб қолмоқда. 2023 йил охиридаги маълумотларга кўра, Украинада уруш бошланганидан бери Россия металларининг Европа Иттифоқига импорти 13,7 миллиард еврони ташкил қилган. Россия металларининг энг йирик харидорлари орасида Германиянинг GGP Metal Powder (уруш бошланганидан бери 66 миллион долларлик мис), Франциянинг қурол ишлаб чиқарувчи Safran (25 миллион долларлик титан) ва Нидерландиянинг C. Steinweg логистика фирмаси (100 миллион долларлик турли металлар) бор. 

Аввалроқ кўплаб экспертлар Россия металлари савдосини тақиқлаш Европа Иттифоқи санкцияларининг кейинги пакетларидан бирига киритилиши ҳақида фикр билдирганди.