Ruhoniy Isroilga qarshi birlashishga chaqirdi

Eron prezidenti Hasan Ruhoniy arab davlatlarini Isroilga qarshi turish maqsadida birlashishga chaqirdi, deb xabar bermoqda Reuters.

Ruhoniy Islom hamkorlik tashkilotining favqulodda yig‘ilishida chiqish qilib, mamlakatlar yetakchilarini ichki mojarolarga barham berish hamda Isroilga qarshi birlashishga chaqirdi.

Shuningdek uning ta'kidlashicha, AQSh prezidenti Donald Trampning al-Qudsni Isroil poytaxti sifatida tan olish bo‘yicha qarori shuni ko‘rsatadiki, Qo‘shma Shtatlar mintaqadagi mojarolarga yechim topishda vositachi vazifasini uddalay olmayapti.

Eslatib o‘tamiz, avvalroq Turkiya prezidenti Rajab Toyyib Erdo‘g‘an Istanbuldagi musulmon mamlakatlar yetakchilarining sammitida al-Qudsni Falastin poytaxti sifatida tan olishni taklif qildi hamda shaharni «musulmonlar uchun qizil chiziq» deb atagandi.