Navoiyda avtobus YTHga uchradi. 2 kishi halok bo‘ldi

Navoiyda yo‘lovchi avtobus YTHga uchradi. Bu haqda Kun.uz manbasi xabar berdi.

Ma’lum bo‘lishicha, YTH bugun tongda viloyatning cho‘l hududida sodir bo‘lgan. “Zarafshon–Navoiy” yo‘nalishida harakatlanib ketayotgan avtobus haydovchi boshqaruvni yo‘qotishi oqibatida yo‘ldan chiqib ketib, ag‘darilgan.

“Hamma jim ketayotgandi, birdan avtobus ag‘darilib, dumalab ketdi. Nima bo‘lganini sezmay ham qoldik. Avtobus bosib qolgan 2 kishi shu joyning o‘zida vafot etdi, jarohatlanganlar ham talaygina”, deydi avtobusda bo‘lgan yo‘lovchilardan biri Kun.uz jurnalisti bilan suhbatda.

Navoiy viloyati IIB axborot xizmatining ma’lum qilishicha, YTH 5 yanvar kuni soat taxminan 7:40 larda Tomdi tumanining Tomdibuloq ovuli hududidan o‘tgan A-379 “Navoiy–Uchquduq” yo‘lining 167-168 kilometri oralig‘ida sodir bo‘lgan. 47 nafar yo‘lovchisi bo‘lgan avtobusni 40 yoshli Sh.X. “Zarafshon–Navoiy” yo‘nalishi bo‘ylab boshqarib borayotib, boshqaruvni yo‘qotgan.

“Hozirda vaziyatni to‘liq o‘rganish, jabrlanganlar va ularning oila a’zolariga yordam ko‘rsatish hamda og‘ir oqibatlarga olib kelgan shart-sharoitlarga huquqiy baho berish maqsadida Navoiy viloyati IIB tomonidan voqea tafsilotlari o‘rganilmoqda”, deyiladi IIB rasmiy axborotida.

Avvalroq Sirdaryo va Jizzaxda YHX patrul avtomobillari piyodalarni urib yuborgani xabar qilingandi.