Renovatsiya dasturi: 2026 yilda kamida 30 mingta xonadonni foydalanishga topshirish buyurildi

Prezident qo‘ygan vazifaga ko‘ra, bu yil O‘zbekistonda 140 mingta yangi xonadon foydalanishga topshirilishi, shundan kamida 30 mingtasi renovatsiya mahsuli bo‘lishi kerak. Shavkat Mirziyoyev “barak” tipidagi uylar joylashgan ayrim manzillarni misol qilib keltirdi.

Foto: Kun.uz

2026 yilda O‘zbekiston bo‘ylab 140 ming xonadonli ko‘p qavatli uylarni topshirish zarur, dedi prezident Shavkat Mirziyoyev 14 aprel kungi selektorda.

Bunda renovatsiyaga alohida e’tibor qaratish muhimligi ta’kidlandi. Chunki shahar va shaharchalar eniga kengayib borsa, infratuzilmaga xarajat 4-5 karra oshadi; maktab, bog‘cha, poliklinikaga masofasi uzayadi; minglab gektar ekin yeri qisqaradi.

Masalan, Samarqand shahrining temiryo‘l orti hududi, Kattaqo‘rg‘on shahri, Oqtosh, Ishtixon, Bulung‘ur, Juma, Jomboy kabi shaharchalarda “barak” tipidagi uylar ko‘p. Shu bois eskirgan uylar o‘rnida renovatsiya asosida ko‘p qavatli uylar qurish zarurligi ko‘rsatib o‘tildi.

Umuman, bu yil renovatsiya zonalarida kamida 30 ming kvartirali ko‘p qavatli uylarni foydalanishga topshirish muhimligi qayd etildi.

Avvalroq Urbanqo‘m raisi Sherzod Qudbiyev renovatsiya loyihalarini boshlash uchun mulkdorlarning hammasi emas, 80 foizidan rozilik olish kifoya bo‘lishini aytgandi. Tegishli qonun Senat ma’qullovidan o‘tgan.