Prezident advokatlar duch kelayotgan to‘siqlarni bartaraf etish topshirig‘ini berdi

5 mart kuni O‘zbekiston prezidenti Shavkat Mirziyoyev raisligida Korrupsiyaga qarshi kurashish bo‘yicha milliy kengash faoliyati yuzasidan kengaytirilgan yig‘ilish bo‘lib o‘tdi. Unda davlat rahbari sud tizimida korrupsiyaviy xavf-xatarlarning oldini olish, odil sudlov sifati va samaradorligini oshirish doimo diqqat markazida bo‘lishi zarurligini ta’kidladi.

Yig‘ilishda sudlar mustaqilligini ta’minlash bo‘yicha katta islohotlar amalga oshirilganiga qaramay, sudyalarni majlisga chaqirish, ularga vakolatiga kirmaydigan vazifalarni yuklash holatlari ham uchrab turgani qayd etildi. Shuningdek, ayrim idoralar tomonidan sudga ta’sir o‘tkazishga urinishlar hali-hanuz davom etayotgani ko‘rsatib o‘tildi.

«Barcha rahbarlarni qat’iy ogohlantiraman. Sudlar faoliyatiga har qanday aralashish odil sudlovga soya solish deb baholanadi. Bu bo‘yicha so‘rov ham, javobgarlik ham qattiq bo‘ladi», — dedi Shavkat Mirziyoyev.

Shu bilan birga odil sudlovni amalga oshirishda advokatlar o‘rni juda muhimligi, bu borada advokatlarga himoyasidagi fuqaroga o‘z vaqtida huquqiy yordam ko‘rsata olishlari uchun imkoniyat yaratish kerakligi qayd etildi.

«Mutasaddilarga uch oy ichida sifatli yuridik yordam ko‘rsatilishida advokatlar faoliyatiga to‘sqinlik qilayotgan omillarni bartaraf etish bo‘yicha qonun loyihasini kiritish topshirildi», — deyiladi prezident matbuot xizmati xabarida.