Metan zapravkalar faoliyatiga qo‘yilgan cheklovlar bosqichma-bosqich olib tashlanadi

Energetika vazirligi 6 martdan boshlab metan zapravkalar faoliyati bosqichma-bosqich yo‘lga qo‘yilishini ma’lum qildi.

Qayd etilishicha, mart oyining dastlabki kunlarida O‘zbekistonda havo harorati keskin tushib, tabiiy gaz iste’molining ortishi va gaz quvurlarida bosimning pasayishiga sabab bo‘lgan. Mazkur holatda birinchi navbatda aholi hamda ijtimoiy soha obektlarini tabiiy gaz bilan ta’minlashga ustuvorlik qaratilgan va avtomobillarga gaz to‘ldirish kompressor shoxobchalari faoliyati vaqtinchalik to‘xtatilgan.

«O‘tgan kunlar mobaynida olib borilgan tezkor chora-tadbirlar natijasida quvurlarda gaz bosimi normallashtirildi. Bu esa metan zapravkalar ish faoliyatini tiklash imkonini yaratdi», — deyiladi xabarda.

Ta’kidlanishicha, 6 mart kuni soat 09:00 dan e’tiboran metan zapravkalar faoliyati bosqichma-bosqich yo‘lga qo‘yiladi.

Vazirlik keltirilgan noqulayliklar uchun iste’molchilardan uzr so‘raydi.

Bundan avvalroq, 9–12 fevral kunlari ham O‘zbekistonning barcha hududlarida metan shoxobchalarga gaz yetkazib berish vaqtincha qisqartirilgan edi. Bu haqda xabar bergan Energoinspeksiya qisqarishga «havo harorati keskin sovib ketishi»ni sabab qilib ko‘rsatgandi.