Bo‘lib to‘lashga sotilgan obektlar bo‘yicha ustama hisoblash to‘xtatiladi

O‘zbekistonda xususiylashtirish doirasida bo‘lib to‘lash sharti bilan sotilgan obektlar uchun qoldiq summaga har yili 14 foiz ustama hisoblash bekor qilinadi. Bu haqda 14 aprel kungi selektorda prezident Shavkat Mirziyoyev ma’lum qildi.

Yig‘ilishda, shuningdek, xususiylashtirish dasturiga obektlarni kiritish, ularni sotish va investitsiya samaradorligi bo‘yicha hokimlar Davlat aktivlari agentligi bilan tengma-teng javob berishi ham belgilandi.

Qayd etilishicha, so‘nggi to‘rt yilda auksionda sotilgan 11,5 ming gektar yerdan 3 ming gektarida qurilish boshlanmagan. Oqibatda qo‘shimcha 100 ming ish o‘rni, 20-25 trillion so‘m qo‘shilgan qiymat yo‘qotilmoqda.

Auksionga chiqarilgan 582 gektar yer uchastkasi, 122 ta davlat obekti bir yildan beri sotilmay turibdi.

Chunki xususiylashtirish dasturini qabul qilishda ham, obektlarni sotishda ham hokimlarning o‘rni bilinmayapti, tadbirkorlarning fikri oldindan o‘rganilmayapti. Aslida har obektni sotishda hududga investitsiya, mahalla uchun ish o‘rni birinchi o‘rinda bo‘lishi kerak, deya ta’kidladi prezident.