Yiliga 80 mingtadan xonadon qurishimiz zarur – prezident

2 noyabr kuni prezident Shavkat Mirziyoyev rahbarligida navbatdagi videoselektor yig‘ilishi bo‘lib o‘tdi. Unda aholini sifatli uy-joy bilan ta'minlash hamda ekologik vaziyat va havo tozaligini yaxshilash maqsadida «Yashil makon» umummilliy loyihasi muhokama qilindi.

«Bu ikki masala ham juda muhim. Ikki sohada ham ko‘p yillar davomida muammolar yig‘ilib qolgan. Partiyamiz «Inson qadri uchun» uchun shiori bilan chiqdi, saylov oldidan ko‘p va'dalar berdik. Odamlar saylovlarga umid bilan chiqishdi, kelgusi 5 yilda yaxshi, xalqchil loyihalar kutishyapti.

Bugungi ikki masalaning barchasi joylardagi rahbarlarga bog‘liq. Sababi, zarur pullar ajratildi, uylar qurilishi bilan ipoteka dasturi ham yaratildi.

Aytish joizki, so‘nggi yillarda yurtimizda ipoteka dasturlari doirasida 140 mingdan ortiq uy-joylar barpo etildi. Bu raqam oldingi yillarga solishtirganda 10 martadan ham ko‘p. Bu ko‘p albatta, lekin yetarli bo‘lmayapti.

Mamlakatimizda har yili 300 mingga yaqin nikohlar qayd etilmoqda, aholimiz kelgusi besh yilda 38 millionga yetishi kutilmoqda. Misol uchun, so‘nggi 30 yilda Namangan, Termiz va Xonobod shaharlari aholisi 2 baravarga, Qarshi, Jizzax, Marg‘ilon, Nukus, Andijon, Zarafshon va Quvasoy aholisi 1,5 baravarga o‘sgan.

Samarqand va Namangan shaharlari aholisi 1 milliondan oshadi. Bularni inobatga olib, aholining uy-joyga bo‘lgan talabini qondirish uchun kelgusi besh yilda yiliga 80 mingtadan xonadon qurishimiz zarur.

Aytish joizki, joylardagi saylovoldi uchrashuvlarida har bir hududda barcha iqtisodiy va ijtimoiy infratuzilmaga ega bo‘lgan «Yangi O‘zbekiston massivlari»ni barpo etish, bu orqali kelgusi besh yilda 250 mingdan ziyod xonadonlar qurishni reja qilganmiz.

Eng avvalo, «Yangi O‘zbekiston massivlari» kompleks rivojlanish tamoyili asosida barpo etiladi. Bu nima degani? Bunda har bir massivga ajratiladigan yer uchastkalarida sanoat loyihalari, xizmat ko‘rsatish obektlari va ijtimoiy infratuzilma bir vaqtda quriladi», deya davlat rahbarining so‘zlarini keltirmoqda Kun.uz muxbiri.