Ko‘p qavatli uylarga tutash maydonlarni betonlashtirganlar jazolanadi

Qonunchilik palatasi yalpi majlisida atrof-muhit, hayvonot va o‘simlik dunyosining muhofazasini kuchaytirish, tabiiy resurslardan oqilona foydalanishni ta’minlashga qaratilgan qonun loyihasi loyihasi deputatlar tomonidan qabul qilinib, Senatga yuborildi.

Qonun loyihasi bilan “Tabiatni muhofaza qilish to‘g‘risida”gi, “Atmosfera havosini muhofaza qilish to‘g‘risida”gi, “Chiqindilar to‘g‘risida”gi qonunlarga, Jinoyat hamda Ma’muriy javobgarlik to‘g‘risidagi kodekslarga qo‘shimcha va o‘zgartirishlar kiritilmoqda.

Jumladan, konstitutsiyaning 49-moddasida nazarda tutilgan fuqarolarning atrof-muhit holati haqida ishonchli axborotga ega bo‘lish huquqini ta’minlash uchun, “Tabiatni muhofaza qilish to‘g‘risida”gi qonun avtomatik monitoring stansiyalari ma’lumotlarini Atrof-muhit davlat monitoringi tizimining yagona geoaxborot ma’lumotlar bazasiga real vaqt rejimida kiritish belgilovchi norma bilan to‘ldirilmoqda.

Chiqindilarni olib chiqib ketish choralarini ko‘rmaganlik va obodonlashtirish ishlarini amalga oshirmaganlik, ko‘p kvartirali uyga tutash tuproq va yashil qoplamali yer uchastkasini o‘zboshimchalik bilan betonlashtirganlik hamda aholi punktlari va shahar markazlarida oldindan mavjud bo‘lgan ariqlar, irrigatsiya tizimlarini o‘zboshimchalik bilan ko‘mib tashlaganlik uchun javobgarlikni nazarda tutuvchi qo‘shimchalar kiritilmoqda.

O‘rmon fondi yerlarini qonunga xilof ravishda berish va ularda bino-inshootlar va imoratlarni qurish uchun ham javobgarlik belgilanmoqda.