1 sentabrdan «dekret» to‘lovlarining bir qismini davlat to‘lab beradi

Sentabr oyidan boshlab homiladorlik nafaqasi («dekret») to‘lovlarining bir qismini davlat budjeti hisobidan to‘lash tartibi joriy etilmoqda. Bu haqda prezident ehtiyojmand aholining ijtimoiy himoyasini yanada kuchaytirish chora-tadbirlari yuzasidan o‘tgan videoselektorda aytib o‘tdi.

Yig‘ilishda ishchi-xodimlarning samarali faoliyati uchun 3 ta asosiy ijtimoiy masalada (kasallik, ishsiz qolish, homiladorlik) bosqichma-bosqich kafolatli himoyalash tizimi joriy etilishi ta’kidlandi.

«Misol uchun, norasmiy sektorda ayollar ulushi 57 foizni tashkil qilmoqda. Sababi, ko‘plab ish beruvchilar homiladorlik nafaqasini to‘lashda ortiqcha xarajat qilmaslik uchun ayollarni rasmiy ishga olmaslikka harakat qiladi. Bu borada 2022 yil sentabrdan boshlab «dekret» to‘lovlarining bir qismini davlat budjeti hisobidan to‘lash tartibi joriy etilmoqda», deyiladi xabarda.

Mazkur ishlarni tizimli yo‘lga qo‘yish maqsadida 1 sentabrdan Moliya vazirligi huzurida Ijtimoiy sug‘urta jamg‘armasi tashkil etiladi. Jamg‘armaga joriy yilda budjetdan 170 milliard so‘m ajratiladi.

Mas’ullarga 1 avgustga qadar «dekret» pullarini to‘lash jarayonini to‘liq raqamlashtirish topshirildi.