Bugun Valbuena "Lion"da tibbiy ko‘rikdan o‘tadi

Moskvaning "Dinamo" jamoasining fransiyalik yarimhimoyachisi Mate Valbuena Fransiyaga qaytmoqda.

L`Equipe nashrining xabar berishicha, 30 yoshli futbolchi "Lion"da tibbiy ko‘rikdan o‘tish uchun Fransiyaga uchib ketgan.

Nashrda yozilishicha, Valbuena "sherlar" bilan 3 yillik shartnoma imzolaydi. U bu jamoada yiliga 5-6 mln yevro maosh oladi.

Ma'lumot uchun, 2014 yilning yozida "Marsel"dan "Dinamo"ga kelgan Valbuena o‘tgan mavsumda Rossiya chempionatida 25 uchrashuvda maydonga tushib, 4ta gol urdi va 11ta golli uzatmani amalga oshirdi. U yangi mavsumdagi 4 tur davomida ham 2ta gol va 2ta golli uzatma muallifi bo‘lishga ulgurgandi. Xususan, 9 avgust kuni 4 tur doirasida "Anji"ga qarshi o‘yinda uning goli moskvaliklarga mavsumdagi ilk g‘alabani taqdim etgandi.

"Dinamo" o‘tgan mavsum so‘ngida moliyaviy muammolarga uchragan va bir qator futbolchilar, jumladan Kevin Kurani jamoani tark etgan.