Qozog‘istonda 5 nafar o‘zbekistonlik is gazidan zaharlanib vafot etdi

Qozog‘istonning Olmaota shahri yaqinidagi Turar qishlog‘ida 10 nafar o‘zbekistonlik is gazidan zaharlanib, shifoxonaga yotqizilgan.

Novosti-Kazaxstan nashrining xabariga ko‘ra, ulardan 5 nafarining hayotini saqlab qolishning iloji bo‘lmagan. Halok bo‘lganlarning 2 nafari kichik yoshli bolalar edi.

Nashrning ma'lumotiga ko‘ra, 2 yanvar kuni O‘zbekiston fuqarolari bo‘lgan 10 kishi zaharlangani haqida ma'lumot kelib tushgan.

"3 nafar katta yoshli kishi va 2 nafar yosh bola tibbiy yordam ko‘rsatilmasidan oldinroq jon bergan. Yana 5 kishi Kaskelen shahridagi markaziy shifoxonaga yotqizildi", deyiladi xabarda.

Bu voqea noxush hodisa sifatida qayd etilgan. Dastlabki taxminlarga ko‘ra, marhumlar is gazidan zaharlanib halok bo‘lgan.