Jizzaxda patronaj oyligi o‘tkazilmoqda

O‘zbekiston Respublikasi Sog‘liqni saqlash vazirligi tashabbusi bilan o‘tkazilayotgan patronaj oyligi Jizzax viloyatida ham yuksak saviyada davom etmoqda. Bu haqda O‘zA xabar bermoqda.

Jizzax shahar tibbiyot birlashmasiga qarashli 5-oilaviy poliklinika jamoasi patronaj oyligini uyushqoqlik bilan o‘tkazmoqda.

Shaharning Ko‘tarma, Kimyogar, Madaniyat, Ravalliq, Sayxon, Ulug‘bek va Bobur nomidagi mahallalari hududidagi 35 mingdan ziyod aholiga tibbiy xizmat ko‘rsatayotgan ushbu muassasaning moddiy-texnik bazasi mustaqillik yillarida butunlay yangilandi. 

Patronaj oyligini samarali o‘tkazishda viloyatdagi 169 qishloq vrachlik punkti va 5 oilaviy poliklinikaning 1 ming 200 dan ziyod patronaj hamshirasi ishtirok etmoqda. Ular oylik davomida hududdagi xonadonlarda bo‘lib, oilaning har bir a'zosi salomatligi to‘g‘risidagi ma'lumotlarni yangilaydi.