Afg‘onistonda 260 tolib armiyaga taslim bo‘ldi

"Tolibon" radikal harakatining kamida 260 a'zosi Afg‘onistonning Samangan viloyatida armiyaga taslim bo‘ldi, deb ma'lum qildi 26 iyulda Afg‘oniston mudofaa vazirligi. 

Khaama Press agentligining ma'lum qilishicha, toliblar Dara-a-Suf tumanidagi 11 kun uzluksiz davom etgan harbiy operatsiyalardan keyin taslim bo‘lgan. Tumandagi ko‘pchilik qishloqlar jangarilardan ozod qilindi.

Afg‘oniston ichki ishlar vazirligi qurol-aslaha va o‘q-dorilar bilan birga taslim bo‘lganlar orasida 2 qo‘mondon ham borligini ma'lum qildi. 

Afg‘onistondagi vaziyat oxirgi oylar sezilarli yomonlashdi. Avval mamlakatning qishloq joylarining katta qismini egallab olgan "Tolibon" yirik shaharlarga hujumlarni boshladi. Shuningdek, mamlakat hududida IShIDning ta'siri kuchaymoqda.