Normativ-huquqiy hujjatlar loyihalari muhokamasi portalida Bandlik va mehnat munosabatlari vazirligining “2019 yilda aholi bandligini ta'minlash va yangi ish o‘rinlarini tashkil etish Davlat buyurtmasi to‘g‘risida”gi hujjat loyihasi joylashtirildi.
Hujjat bilan 2019 yilda aholi bandligiga ko‘maklashishning asosiy yo‘nalishlari belgilandi.
Yo‘nalishlardan birida aytilishicha, 30,2 ming nafar ishsizlarni Bandlikka ko‘maklashish davlat jamg‘armasi mablag‘lari hisobidan kasbga tayyorlash va qayta o‘qitish bo‘yicha davlat buyurtmasi shakllantiriladi.
Shuningdek, 49,9 ming nafar ishsizlar Jamoat ishlari jamg‘armasi hisobiga haq to‘lanadigan jamoat ishlariga jalb etiladi.
Bundan tashqari, O‘zbekiston hukumati 2019 yilda 200,4 ming nafar fuqaroni xorijiy davlatlarda ishga joylashtirishni rejalashtiryapti.
Eslatib o‘tamiz, avvalroq O‘zbekistonda o‘z-o‘zini band qilish uchun vaqtinchalik mehnat patenti joriy etilishi xabar qilingandi.
