Hududiy futbol assotsiatsiyalari tashkil etiladi

Vazirlar Mahkamasi tomonidan “Hududiy futbol assotsiatsiyalari faoliyatini yanada qo‘llab-quvvatlash chora-tadbirlari to‘g‘risida”gi 311-son qaror qabul qilindi. Hujjat Prezidentning “O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida” 2019 yil 4 dekabrdagi PF-5887-son Farmonida qo‘yilgan vazifalarni amalga oshirish uchun qabul qilingan.

Norma’ning yozishicha, Qoraqalpog‘iston Respublikasi, viloyatlar va Toshkent shahar hududiy futbol assotsiatsiyalari oldiga quyidagi asosiy vazifalar qo‘yildi:

yuqori iqtidorga ega bo‘lgan yosh futbolchilarni tanlash va saralab olish tizimini tubdan takomillashtirish;

ushbu sohasiga xususiy investitsiyalarni keng jalb etish;

futbol sohasining bozor mexanizmlari asosida boshqarilishini ta'minlash;

futbol klublarini xususiy sektorga o‘tkazishni tashkil etish hamda ular orasida sog‘lom sport raqobati muhitini yaratish;

futbol musobaqalari tomoshabopligini oshirish hamda futbolni rivojlantirishning yangi tizimini samarali yo‘lga qo‘yish orqali o‘zbek futboli brendini yaratish.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga quyidagilar topshirildi:

hududiy futbol assotsiatsiyalari uchun bino va inshootlar taqdim etish hamda homiylar biriktirish;

moddiy-texnik bazasini mustahkamlashga ko‘maklashish hamda futbol mahorati maktablari, shuningdek, futbolga ixtisoslashtirilgan sport maktablarini rivojlantirishni doimiy nazorat qilish;

“Sport maktablari futbol ligasi” va “Professional futbol maktablari ligasi” musobaqalarini moliyalashtirish.

Futbolni rivojlantirish xarajatlari mahalliy budjetlarning qo‘shimcha daromadlari hisobidan moliyalashtiriladi.

Hujjat 23.05.2020 yildan kuchga kirdi.