Buyuk Britaniyada koronavirusdan davolashda aspirin sinab ko‘rilmoqda

Buyuk Britaniyada COVID-19 infeksiyasidan samarali davolashda  qonni suyultiradigan vosita sifatida aspirin sinab ko‘rilmoqda. Bu haqda The Guardian nashri xabar berdi.

“Aspirin foydali ekanligiga asosli taxminlar bor, u bezarar, arzon va sotuvda keng tarqalgan”, – deya tadqiqot rahbarlaridan biri Piter Xorbidan iqtibos keltirmoqda The Guardian.

Ma'lum qilinishicha, koronavirus bemorlarida trombotsitlarning o‘ta faolligi sababli qonda tiqilmalar paydo bo‘lish xavfi yuqori bo‘ladi. Aspirin antitrombotsitar vosita hisoblanadi, u bemorlarda tiqilmalar paydo bo‘lish xavfini kamaytiradi.

Tadqiqot davomida 2 mingga yaqin bemor odatiy davolanish sxemasiga qo‘shimcha ravishda kuniga 150 mg aspirin oladi. So‘ngra ularning salomatligi to‘g‘risidagi ma'lumotlar standart tibbiy yordam olayotgan bemorlar ma'lumotlari bilan solishtiriladi.