Parij va Berlin Yevroittifoq rossiyalik talabalar, rassomlar, olimlar va mutaxassislarga viza berishda davom etishi kerak deb hisoblamoqda.
Fransiya va Germaniya qo‘shma bayonotida YeIni hukumatga aloqador bo‘lmagan rossiyaliklarga viza berishni davom ettirishga chaqiradi. Bu haqda Bloomberg YeI tashqi ishlar vazirlari uchrashuvi uchun tayyorlangan hujjat matniga asoslanib xabar berdi.
Agentlikning ma’lumotiga ko‘ra, Parij va Berlin Yevroittifoq rossiyalik talabalar, rassomlar, olimlar va mutaxassislarga viza berishda davom etishi kerak deb hisoblamoqda.
Vazirlar uchrashuvida murosa sifatida rossiyaliklarning viza olishi uchun qo‘shimcha byurokratik jarayonlardan o‘tishi va ko‘proq pul to‘lashi ko‘zda tutilgan variant muhokama qilinadi, deb yozadi Bloomberg.
Avvalroq rossiyaliklarning Yevroittifoqqa kirishi taqiqlanishiga Portugaliya qarshi chiqqandi. Mamlakat tashqi ishlar vazirligining ta’kidlashicha, Rossiya xalqi Yevropa sanksiyalarining asosiy nishoni bo‘lmasligi kerak.
Shuningdek, Kipr va Gretsiya ham rossiyaliklarga viza berish taqiqlanishiga qarshi chiqqan. O‘z navbatida, AQSh Rossiya xalqiga zarar yetkazmaslik uchun viza berishni to‘xtatmasligini bildirdi.
Estoniya, Finlandiya, Latviya va Chexiya YeIni rossiyaliklarga viza berishni to‘xtatishga chaqirmoqda.
