«Moskva-O‘zbekiston» mikroavtobusining sovuqda qolgan yo‘lovchilari qutqarildi 

10 yanvar kuni Rossiyaning Nijniy Novgorod viloyati, Navashinskiy tumanida «Moskva-O‘zbekiston» mikroavtobusi yo‘lovchilari politsiya xodimlari tomonidan qutqarib olindi, deb xabar berdi «Kommersant’» Nijniy Novgorod IIV boshqarmasiga tayanib. 

Xabarga ko‘ra, mikroavtobus katta yo‘lda buzilib qolgan, uning salonida 19 kishi bo‘lgan. 40 daraja sovuqda qolgan yo‘lovchilar dispetcherlik xizmatiga qo‘ng‘iroq qilib, yordam so‘rashganidan so‘ng, YPX xodimlari tomonidan topilgan. Tuman hokimiyati jabrlanganlarni tashish uchun transport ajratgan, ular ichki ishlar bo‘limiga olib borilgan.

Shu bilan birga, politsiya avtobus yo‘lovchilarining maqomiga oydinlik kiritish va ularning Rossiyada bo‘lishiga ruxsat beruvchi hujjatlarini tekshirishga qaror qilgan. Buzilgan mikroavtobus ta’mirlash uchun evakuatsiya qilingan.