Trampning migratsiya paketi Senatdan o‘tmadi

Natijada Senatdagi respublikachilar yetakchisi Jon Tun ovoz berishni o‘tkazmasdan senatorlarni parlament ta’tiliga chiqardi. Ta’til kelasi hafta oxirigacha davom etadi.

Asosiy bahs mavzusi — Tramp tarafdorlari uchun mo‘ljallangan taxminan 1,8 milliard dollarlik kompensatsiya jamg‘armasi bo‘ldi. AQSh Adliya vazirligi bu jamg‘arma haqida 18 may kuni ma’lum qilgan va uni oxirgi daqiqada migratsiya paketiga kiritgan.

Bu mablag‘lar Jo Bayden ma’muriyati davrida “siyosiy ta’qibga uchragan” deb hisoblangan shaxslarga to‘lanishi rejalashtirilgan.

Kompensatsiya oluvchilar qatorida 2021 yil 6 yanvarda Vashingtondagi Kapitoliyga hujum qilishda ayblanib sudlangan va keyinchalik Tramp Oq uyga qaytgach afv etgan uning yuzlab tarafdorlari ham bo‘lishi mumkin.

Demokratlar mazkur jamg‘armani “pora jamg‘armasi” deb atadi. Shu bilan birga, bu tashabbus respublikachilarning o‘zi ichida ham norozilik uyg‘otdi.

Ayrim respublikachi senatorlar kompensatsiya jamg‘armasi noyabr oyida bo‘lib o‘tadigan oraliq Kongress saylovlari arafasida saylovchilar tomonidan salbiy qabul qilinishi mumkinligidan xavotirda.

Ko‘plab amerikaliklar Eron bilan urush tufayli yonilg‘i va oziq-ovqat narxlari keskin oshib ketganidan shikoyat qilmoqda. Biroq Tramp bu masala uning asosiy ustuvor yo‘nalishi emasligini bir necha bor bildirgan.

Shuningdek, respublikachilarning bir qismi Trampning Oq uy yonida katta bal zali qurish rejasidan ham norozi bo‘ldi. Migratsiya paketiga prezident xavfsizlik xizmati ehtiyojlari uchun qo‘shimcha 1 milliard dollar ham kiritilgan bo‘lib, kelajakda mazkur obekt xavfsizligini ta’minlash ham shu xizmat zimmasiga tushadi.