SES sohasida kadrlarni qayta tayyorlash markazi tashkil etiladi

Vazirlar Mahkamasining “Canitariya-epidemiologik osoyishtalik va jamoat salomatligi sohasida kadrlarni qayta tayyorlash va ularning malakasini oshirish markazini tashkil etish to‘g‘risida”gi qarori loyihasi e’lon qilindi.

Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi huzurida Sanitariya-epidemiologik osoyishtalik va jamoat salomatligi sohasida kadrlarni qayta tayyorlash va ularning malakasini oshirish markazi tashkil etiladi.

Quyidagilar markazning asosiy vazifalari etib belgilanadi:

• ilg‘or xorijiy tajribani o‘rganish asosida zamonaviy metodikalardan foydalangan holda oliy ta’lim muassasalarining sanitariya-epidemiologik osoyishtalik va jamoat salomatligi sohasidagi kadrlarni qayta tayyorlash va ularning malakasini oshirish bo‘yicha umumta’lim dasturlar, o‘quv-metodik va normativ materiallarni ishlab chiqish;
• umume’tirof etilgan xalqaro ta’lim standartlari va talablari, o‘qitishning zamonaviy shakllari, ilg‘or pedagogik, axborot-kommunikatsiya va innovatsiya texnologiyalari asosida sanitariya-epidemiologiya sohasidagi kadrlarni qayta tayyorlash va ularning malakasini oshirish;
• tegishli yo‘nalishlarning o‘quv dasturiga mos holda ishlab chiqilgan o‘quv-metodik resurslar asosida masofadan o‘qitishning onlayn va offlayn shakllarida qayta tayyorlash va malaka oshirish kurslarini tashkil etish;
• malaka oshirishning ta’lim jarayoni sifati va natijalarini tizimli tahlil qilish, monitoringini olib borish;
• biologik xavfsizlik sohasida kadrlar salohiyatini mustahkamlash va mutaxassislarni tayyorlash tizimini takomillashtirish, shu jumladan toksikolog, profpatolog, epidemiolog, bakteriolog, virusolog, parazitolog, entomolog va epizootolog kabi mutaxassislarni tayyorlash mexanizmlarini takomillashtirish va nufuzini oshirish;
• biologik jihatdan xavfli obektlardan foydalanishda biologik xavfsizlikni ta’minlash uchun kadrlar, shu jumladan ma’muriy-texnik xodimlarni tayyorlash darajasini oshirish;
• biologik xavflarni tahlil qilish, xavflarni boshqarish texnologiyalarini qo‘llash kabi yo‘nalishlarda o‘quv dasturlarini ishlab chiqish;
• idoralararo hamkorlik qilish, shu jumladan biologik tusga ega favqulodda holatlarning oqibatlarini bartaraf etish bo‘yicha mashqlar va mashg‘ulotlarni o‘tkazish;
• sanitariya-gigiyenik faoliyatning samaradorligini oshirish, sanitariya-epidemiologiya institutlarning faoliyatini muvofiqlashtirish hamda ilmiy-metodik ishlarni tashkil etish;
• xalqaro aloqalarni kengaytirish va mustahkamlash, konferensiyalar, ko‘rgazmalar va boshqa tadbirlar o‘tkazish orqali sanitariya-epidemiologik osoyishtalik va jamoat salomatligi sohasida mamlakatimiz yutuqlarini xalqaro darajada keng yoritish, xorijiy ta’lim muassasalari bilan hamkorlik qilish;
• markazda kadrlarni qayta tayyorlash va ularning malakasini oshirish bo‘yicha parametrlarini Sanitariya-epidemiologik osoyishtalik va jamoat salomatligi qo‘mitasi bilan kelishilgan xolda tasdiqlash.