Dohada Vatandoshlar markazini tuzishga kelishib olindi

Uchrashuvda O‘zbekiston Vazirlar Mahkamasi huzuridagi Migratsiya agentligi direktori Behzod Musayev va tashqi ishlar vaziri o‘rinbosari Olim Abdullayev boshchiligidagi mamlakat delegatsiyasi ishtirok etdi.

Muloqot davomida vatandoshlarning yashash, turmush sharoitlari, sog‘liqlari, ish va o‘qish joylari hamda muammolari o‘rganildi.

Shuningdek, O‘zbekistondan Qatarga vaqtincha ishlash uchun kelayotgan yurtdoshlarni munosib ish o‘rinlari bilan ta’minlash, ularga zarur sharoitlarni yaratish va haq-huquqlarini mustahkam himoya qilish bo‘yicha amalga oshirilayotgan ishlar haqida so‘zlab berildi.

Yurtdoshlar bilan munosabatlarni yanada mustahkamlash, ularni har tomonlama qo‘llab-quvvatlash bo‘yicha ishlarni tizimlashtirish hamda fuqarolarni birlashtirish maqsadida Doha shahrida Vatandoshlar markazini tuzishga kelishib olindi.