Qamchiq dovonidagi ko‘prik hududida maxsus-taktik o‘quv mashqi o‘tkazildi

Kecha, 12 iyul kuni «Qamchiq» maxsus qidiruv yong‘in-qutqaruv boshqarmasi tomonidan A-373 «Toshkent-O‘sh» avtomobil yo‘lining Qamchiq dovonidan o‘tgan qismida maxsus-taktik o‘quv mashqi o‘tkazildi.

Favqulodda vaziyatlar vazirligi xabariga ko‘ra, dovon yo‘lining 220-kilometrida joylashgan Ohangaronsoy va Qamchiqsoy ko‘prigi hududida «Tabiiy hamda texnogen xususiyatli favqulodda vaziyatlarni bartaraf etishda obekt fuqaro muhofazasi tuzilmalarining hududiy FVDqT xizmatlari bilan hamkorlikdagi harakatlari» mavzusidagi 3 bosqichli o‘quv mashqi tashkillashtirilgan.

Mashg‘ulot davomida shartli ravishda sodir bo‘lgan favqulodda vaziyat oqibatlari bartaraf etilib, aloqa va xabar berish tartibi, jarohatlanganlarga birinchi tibbiy yordam ko‘rsatish, yo‘l-transport hodisasi natijasida yong‘in sodir bo‘lganda yong‘inni bartaraf etish tartibi hamda ko‘prikning tayanch ustunlari va elementlarini mustahkamlashga qaratilgan muhandislik-himoya tadbirlarini amalga oshirish tartibi ko‘rib chiqilgan.