O‘quvchilarni kasb-hunarga o‘rgatuvchi maktablar ro‘yxati shakllantirildi

2023-2024 o‘quv yilidan boshlab, umumiy o‘rta ta’lim maktabi o‘quvchilari bitta kasb-hunarga o‘rgatiladi.

Maktabgacha va maktab ta’limi vazirligi buyrug‘i bilan o‘quvchilarga o‘rgatiladigan bitta kasb-hunar turi va ular amaliyoti yo‘lga qo‘yiladigan 208 ta umumiy o‘rta ta’lim muassasasi ro‘yxati shakllantirildi.

Tanlab olingan maktablarda o‘quvchilar qiziqishidan kelib chiqib, quyidagi 3 yo‘nalishdan biri bo‘yicha kasb-hunar o‘rgatiladi:

- ishchi kasblar (hududning ijtimoiy-iqtisodiy xususiyatidan kelib chiqib, tadbirkor va hunarmandlar jalb qilingan holda 64 turda);

- tadbirkorlik (21 turdagi ishlab chiqarish va xizmat ko‘rsatish sohalari bo‘yicha);

- zamonaviy kasblar (10 dan ortiq axborot texnologiyalari va kreativ industriya yo‘nalishi bo‘yicha).

2023-2024 o‘quv yilida 17 ming nafardan ortiq o‘quvchiga kasb-hunar o‘rgatish rejalashtirilgan.