Yangi o‘quv yilida 800 mingga yaqin bola 1-sinfga qabul qilinadi

2026-2027-o‘quv yilida 795 ming nafardan ortiq bola 1-sinfga qabul qilinishi rejalashtirilgan. Bu haqda Maktabgacha va maktab ta’limi vaziri E’zoza Karimova rahbarligida o‘tgan yig‘ilishda ma’lum qilindi.

Qayd etilishicha, bu yil bolalarni umumta’lim maktablariga onlayn qabul qilish qamrovi oshirildi hamda bu turdagi tuman va shaharlar soni 64 tadan 135 taga, maktablar soni esa 1950 tadan 5690 taga ko‘paydi. Toshkent shahri va Buxoro viloyatidagi maktablar to‘liq onlayn qabul shakliga o‘tkazildi.
Shu bilan birga, ixtisoslashtirilgan, prezident, ijod, sport maktablari, Al-Beruniy xalqaro maktab-internati hamda Milliy dasturga qabul jarayonlari onlayn tarzda olib borilmoqda va bugungi kunga qadar ushbu maktablarga kirish uchun 150 mingdan ziyod ariza kelib tushgan.
Mazkur maktablarga kirish imtihonlari respublika bo‘ylab 15 iyundan 31 iyulga qadar o‘tkaziladi. Bu yilgi tartib bo‘yicha prezident maktablarining birinchi bosqich imtihonlari bir smenada o‘tkazilishi belgilangan.
«Jasorat maktablari»ga kirish uchun 14826 ta ariza kelib tushgan bo‘lib, bu boradagi eng yuqori ko‘rsatkich Namangan, Farg‘ona va Andijon viloyatlariga tegishli.
Yig‘ilishda yozgi oromgohlar faoliyatini tashkil etish masalalari muhokama qilindi. Qayd qilinganidek, shu maqsadda vazirlik markaziy apparati hamda vazirlikning hududiy bo‘linmalarida «Yoz - 2026» shtablari tashkil etilgan.
Muloqot davomida umumta’lim maktablar qoshida tashkil etilgan 1242 ta sog‘lomlashtirish maydonchasida 156 ming nafardan ortiq bolaga sifatli dam olish sharoitini yaratish uchun hududiy mas’ullar va vazirlikning tuman (shahar) bo‘limi boshliqlariga mahalliy hokimliklar bilan hamkorlikda zarur choralarni ko‘rish bo‘yicha topshiriqlar berildi.
Ma’lumot o‘rnida aytilishicha, bu yil O‘zbekiston kasaba uyushmalari Federatsiyasi tarkibidagi 179 ta statsionar oromgohda 158 ming nafar, vazirlik tizimidagi 21 ta sog‘lomlashtirish oromgohiga 7 ming nafar bolani qamrab olinishi rejalashtirilgan bo‘lib, bunda o‘quvchilar maxsus ishlab chiqilgan 12 kunlik namunaviy dastur asosida hordiq chiqaradi.