Qamchiq dovonidagi yo‘lda qolib ketgan haydovchilarga yordam ko‘rsatilmoqda

Bugun, 13 noyabr kuni Qamchiq dovonining yuqori nuqtalarida qor yog‘ishda davom etmoqda. 

FVV, YPX va «Qamchiqavtoyo‘l» IYFUK xodimlari hamkorligida yo‘lni qordan tozalash, muzlamalar hosil bo‘lishining oldini olish va qum-tuz aralashmasini sepish ishlari olib borilmoqda. 

Shuningdek, FVV qutqaruvchilari tomonidan nazorat tadbirlari olib borilib, yo‘lda qolib ketgan haydovchi va ularning avtotransport vositalariga yordam ko‘rsatilmoqda. 

Dovonda avtomobillarning ikki tomonlama harakati davom etmoqda.

Favqulodda vaziyatlar vazirligi yo‘l-transport hodisalari bilan bog‘liq favqulodda vaziyatlarning oldini olish maqsadida, dovon hududida harakatlanishda haydovchilardan barcha xavfsizlik choralarini ko‘rishlarini so‘ragan.