Havo hududi qisman yopildi: Toshkent–Dubay reyslari ortga qaytmoqda

Birlashgan Arab Amirliklari havo hududining qisman yopilishi munosabati bilan Toshkentdan Dubayga yo‘l olgan ayrim aviareyslar jo‘nash aeroportiga qaytmoqda. Bu haqda aviakompaniyalar va aeroport xizmatlari ma’lum qildi.

Foto: Uzbekistan Airports

Xususan, Centrum Air aviakompaniyasining Toshkent – Dubay yo‘nalishi bo‘yicha C6-351 reysi Toshkent xalqaro aeroportiga qaytishga qaror qilgan. Shuningdek, Uzbekistan Airways aviakompaniyasining HY-333 reysi ham xavfsizlik va parvozlarni muvofiqlashtirish talablari asosida jo‘nab ketish aeroportiga qaytmoqda.

Ma’lum qilinishicha, mazkur qarorlar parvoz xavfsizligini ta’minlash maqsadida qabul qilingan. BAA havo hududidagi cheklovlar vaqtinchalik bo‘lishi mumkinligi aytilmoqda.

Ayni paytda aviakompaniyalar vaziyatni kuzatib bormoqda va reyslar jadvali bo‘yicha keyingi qarorlar havo harakatini boshqaruvchi xizmatlar hamda aeroportlar bilan kelishilgan holda qabul qilinadi.

Yo‘lovchilarga esa aviakompaniyalarning rasmiy axborot manbalari orqali yangilangan ma’lumotlarni kuzatib borish tavsiya etilmoqda.