Ҳар йилнинг январь ойида бутун данёнинг сиёсий ва иқтисодий етакчилари Швейцарияга тўпланишади. Улар Давос дам олиш масканида ташкил этиладиган Бутунжаҳон иқтисодий форумида иштирок этишади. 2017 йилги анжуман 17-20 январь кунлари бўлиб ўтади. Унда 3 мингга яқин киши иштирок этмоқда.
Бу йилги форум мавзуси “Ҳозиржавоб ва масъулиятли етакчилик” деб номланди.
Форумда АҚШнинг сайланган президенти Дональд Трамп томонидан бизнес билан алоқалар бўйича президент маслаҳатчиси лавозимига танланган Энтони Скарамуччи ҳам маъруза қилди.
Анжуман давомида дастурга биноан 400га яқин турли мавзуда сессия бўлиб ўтмоқда. Унда Хитой делегациясига жиддий эътибор қаратилган.
Халқаро Валюта жамғармаси раҳбари Кристин Лагарднинг сўзларига кўра, ривожланган мамлакатлар ўрта синф вакиллари инқирозни бошидан кечирмоқда. Унинг айтишича, мамлакатлар ҳукуматлари бу муаммони ҳал этиш учун чоралар кўришлари лозим. Лагарднинг фикрича, иқтисодий нотенгликка барҳам бериш – экстремизм илдизига болта уришдир. ХВЖ раҳбарининг таъкидлашича, “жасур етакчиларнинг халқни тинглаш вақти келган”.
Давос форумида, шунингдек, Brexit, Трампнинг президентлиги, Хитойнинг ўсиб бораётган роли, Россияга қарши санкциялар ҳам муҳим мавзулар ҳисобланмоқда.
Хитой раиси Си Цзиньпин маърузаси форумни очиб берди. У ўз чиқишида протекционизмга йўл қўймасликка, дунёга фаровонлик олиб келаётган глобал эркин савдо ўсишини чекламасликка чақирган. “Савдо урушларида ғолиб бўлмайди”, - деган ХХР раиси.
