Экспертлар ўлим сабабларига доир жаҳон статистикаси таҳлили натижалари билан бўлишишди. "Ортодокс" тиббий портали шу ҳақида хабар берди.
Маълум бўлишича, жаҳон аҳлининг учдан бир қисми ўлимига юрак-қон томир касалликлари сабаб бўлар экан. Мутахассисларнинг таъкидлашича, юқори даромадга эга мамлакатларда юрак-қон томир касалликлари натижасида ҳаётдан кўз юмувчилар сони камайиши тўхтаган, кам даромадли мамлакатларда эса кўрсаткичлар юқорилигича қолмоқда.
Тиббиёт ходимлари кузатувларига кўра, 1990-2015 йилларда юрак-қон томир касалликларидан ҳалок бўлувчиларнинг энг юқори кўрсаткичлари Шарқий Европа, Марказий Осиё, Яқин Шарқ, Жанубий Америка, Океания ва Тропик Африка мамлакатларида қайд этилган. Энг паст кўрсаткич - Япония, Андорра, Перу, Франция, Исроил ва Испанияда.
2015 йилда дунё миқёсида 400 миллиондан зиёд кишида юрак-қон томир касалликлари қайд этилган бўлса, шулардан 18 миллиони ҳаётдан кўз юмган. 1990-2010 йилларда юқори даромадли мамлакатларда тиббий хизмат кўрсатиш сифати ошиши туфайли ўлим кўрсаткичи сезиларли даражада камайган. Бироқ кейинроқ кўрсаткичларнинг яхшиланиш суръати секинлашган.
Шифокорлар ёдга солишмоқда: юқори қон босими, тўғри овқатланмаслик, холестериннинг юқори даражада бўлиши, чекиш, спиртли ичимликлар истеъмоли ва семизлик юрак-қон томир касалликлари хавфли омиллари ҳисобланади.
