Бунёдкорлик — халқимизнинг эзгу ишларидан саналади. Уй кўтариш, кўприк қуриш, йўл созлаш азалдан одамларимизнинг феълида бор. Бироқ эзгу ишлар саъй-ҳаракатида ҳам кўнгилсиз воқеалар учраб туради. KUN.UZ’га бир гуруҳ самарқандлик юртдошларимиз мурожаат қилишди.
Уларнинг ёзган шикоят хати кўра Самарқанд шаҳридаги Ўзбекистон кўчаси 114-Г манзилда 16 қаватли турар-жой мажмуаси қурилиши бошланганлиги, бироқ қурилишни олиб бораётган ташкилот бунинг учун қонуний рухсатнома олмаганлиги, қурилиш ишлари билан аҳолига озор бераётгани баён этилган. KUN.UZ ушбу мурожаатни ўрганиш учун Самарқандга йўл олди. Манзилга етиб боргач, аввало ўша ерда яшовчи аҳоли билан суҳбатлашдик.
Ўзбекистон кўчаси 114-уй манзилида яшовчи Руслан Хайнуров қурилиш учун бирорта ҳужжат йўқлиги, канализация коллектори Сиёбча каналига яқин жойга кўчирилганлиги, канал ёқасидаги дарахтлар кесиб ташланганлиги, қурилиш ишлари мавжуд норматив ҳужжатларга зид равишда 50 метрлик ҳимоя масофасига риоя қилинмасдан олиб борилаётганини баён этди. Шунингдек, қурилиш давомида ишчилардан бирига оғир тан жароҳати етиб, у ногиронга айланганини ҳам айтиб ўтди.
Аҳоли вакиллари куйиниб ўз эътирозларини сўзлар экан, биз қурилишга масъул бўлганларга ҳам алоқага чиқдик. Маълум бўлишича, 16 қаватли турар жой мажмуасининг қурилиш ишлари Самарқанд шаҳар «Дамир Бинокор Қурилиш» масъулияти чекланган жамияти томонидан амалга оширилмоқда.
Биз масъулларни топгунга қадар объект атрофини айланиб чиқдик. Ушбу ҳудудда бошқа қурилиш ишлари ҳам олиб борилаётган экан. Хусусан, ипак тўқимачилик фабрикасининг бир қисмида олиб борилаётган қурилишга тайёргарлик кўриш ишлари ҳам ўша ердаги аҳоли норозилигини келтириб чиқараётганининг гувоҳи бўлдик
Бироз вақт ўтиб, қурилишга масъул бўлганлар келишди. Суҳбатимизни улар билан давом эттирдик. Энг аввало қурилиш билан боғлиқ ҳужжатлар билан танишиб чиқишни сўрадик.
Ҳужжатларга кўра, 1 гектарга яқин ер қурилиш ташкилоти томонидан харид қилинган. «ТошбошпланЛити”нинг қурилиш ишларини олиб бориш учун амал қилиниши лозим бўлган ҳужжатларга доир тавсиясигина бор. МЧЖ Самарқанд шаҳар ҳокимлигига қурилиш ишларини бошлаш учун мурожаат қилган, тегишли ташкилотларнинг муҳри босилган. Бироқ шаҳар ҳокимининг қарори йўқ.
