Бош мия жароҳатлари ҳатто 30 йилдан кейин ҳам ақли заифликка олиб келиши мумкин

Швециялик шифокорларнинг тадқиқотларига кўра, бош мия жароҳатлари (БМЖ) ҳатто 30 йилдан кейин ҳам ўз таъсирини намоён қилиши мумкин экан, яъни бу жароҳатлар йиллар ўтгандан кейин ҳам ақли заифликка олиб келиши эҳтимоли мавжуд. Тадқиқот PLoS Medicine'да тақдим этилди. 

Деменцияга БМЖнинг таъсирини ўрганиш учун Умео Университетида фаолият юритувчи Анна ва Петер Нордстрем Швециянинг 50 ёшдан ошган кишилари орасида тадқиқот ўтказишди. Унда деменциядан азият чекувчи ва ўтмишда бош мия жароҳатларига эга бўлган кишиларга оид маълумотлар таҳлил қилинди. 

Маълум бўлишича, инсон бош мия жароҳати олганидан сўнг биринчи йил деменциянинг пайдо бўлиш хавфи 3,5-4 бараварга ошган. Вақт ўтгач бу хавф пасайган, бироқ БМЖдан ҳатто 30 йил ўтиб ҳам деменция хавфи 1 дан юқори кўрсаткични қайд этган - 1,25.  Ўртача оғирликдаги жароҳат олганларга қараганда оғир ва бир неча марта бош мия жароҳати олган кишилар кўпроқ касал бўлгани аниқланган. 

Бундан ташқари, экспертлар кексайгандаги ақли заифликнинг пайдо бўлишига таъсир кўрсатиши мумкин бўлган бошқа омилларни ҳам келтиришмоқда. Ёш, пенсияга эрта чиқиш, алкоголизм ва депрессия - шулар жумласидандир.