Трампнинг Ким Чен Ин билан учрашувга тайёргарлиги режа бўйича кетмоқда – Пентагон 

АҚШ президенти Дональд Трамп ва Шимолий Корея етакчиси Ким Чен Ин учрашувига тайёргарлик режага қатъий амал қилинган ҳолда кетмоқда. Бу ҳақда журналистларга Пентагон раҳбари Жеймс Мэттис маълум қилди. 

“Бу иттифоқдошларимиз Япония ва Жанубий Корея иштирок этаётган режага асосланган жараёндир”, деб айтган Мэттис ва бу билан давлат департаменти ходимлари шуғулланаётганини қўшимча қилган. 

Мэттиснинг айтишича, учрашувга тайёргарликни ҳаттоки Трампнинг Рекс Тиллерсонни давлат котиби лавозимидан истеъфога жўнатиш қарори ҳам издан чиқармаган. 

Мэттис АҚШ Шимолий Корея етакчиси билан муҳокама қилмоқчи бўлаётган саволлар бўйича маслаҳатлашувларда қолган давлатлар ҳам иштирок этаётганини маълум қилди. 

8 мартда маълум бўлганидек, Ким Чен Ин Жанубий Корея вакиллари орқали Трампга учрашув ўтказиш ҳақидаги таклифни билдирган. Трамп бу таклифни қабул қилган ва учрашув май охиригача бўлиб ўтиши кераклигини айтган. Айни вақтда учрашув ўтадиган жой ва сана белгиланмаган.