Бокс Флойд Мейвезерсиз ҳам жуда яхши яшаяпти – янги чемпион ҳам жуда кўп пул топади, яхши яшайди, кўринишига гап йўқ.
Энтони Жошуа Буюк Британия фуқаролигига эга. У 28 ёшда, бўйи 198 см. Жанглар пайтида у 110-115 кг атрофида бўлади, кўриниши тасаввур қилганингиздан кўра аълороқ, буни Энтонининг Инстаграмидаги олти миллиондан кўп кузатувчилар ҳам тасдиқлайдилар. Ҳозирнинг ўзида унинг Википедиядаги саҳифаси 90-йиллардаги бокс юлдузи, бошқа бир британиялик спортчи Леннокс Льюисникидан каттароқ.
2012 йилда Энтони Жошуа Буюк Британия таркибида олимпиада ғолибига айланди.
2013 йилда, у профессионал боксдаги дебютини ўтказди.
2016 йилда биринчи чемпионлик камарини ютди.
2017 йилда Владимир Кличкони нокаутга учратди.
Шу йилнинг 30 март куни у Жозеф Паркер устидан ғалаба қозониб, учта чемпионлик камарини йиғиб олди ва 18 миллион доллар ишлади.
Албатта, юқорида санаб ўтилган ҳар бир муваффақият замирида ўзига хос воқеалар бор ва ҳар бири алоҳида ҳикояга арзийди.
Адедамбо Жошуа 20-аср бошларида Нигериянинг энг бадавлат инсонларидан бири, Европа билан йирик савдо алоқалари бўлган улкан корпорациянинг бошлиғи бўлган. Унинг авлодларидан бири ирландиялик қизга уйланади ва уларнинг ўғли бир кун келиб хотини билан Англияга кўчиб кетади. 1989 йилда Уотфордда бу оила ўғил кўради ва унга Энтони деб исм қўядилар – Энтони Олувафеми Жошуа.
Кўпчиликка номаълум бўлган бу детал нега бир пайтлар, аниқроғи 2008 йилда Энтони олимпиадада Нигерия номидан қатнашмоқчи бўлганини очиқласа керак. Ҳато нигериялик мураббий у учун тайёргарлик программасини ишлаб чиққан, аммо Жошуа машғулотларга бормайди. Уни терма жамоадан четлаштиришади. Ўша пайтга 19 ёшли йигит эндигина икки йил бокс билан шуғулланган, аммо яхшигина жисмоний кўрсаткичларга эга эди. Қандайдир даражада футбол билан ҳам шуғулланган, юз метрлик масофани 11 секундда босиб ўтарди.
Юқорида тилга олинган 2012 йилдаги Олимпиада чемпионлиги ҳам аслида бўлмаслиги мумкин эди, кўпчилик унинг ўша турнирдаги ғалабаларини ҳакамларнинг мезбонларга ён босиши билан изоҳлашганди. У рақибларини жуда кичик устунлик билан мағлубиятга учратганди. Жумладан, биринчи босқичда Эрисланди Савонни 17:16, ярим финалда қозоғистонлик Иван Дичкони 13:11 ҳисобида енгган. Финалда олдинги олимпиада чемпиона италиялик Роберто Каммаралле билан жанг 18:18 билан якунланган ва фақат қўшимча кўрсаткичлар бўйича Энтони ғолиб деб топилганди.
Бундан ташқари, профессионал бокс промоутерларининг Энтони билан жиддий қизиқишлари ҳам олимпиадада унинг номини танитиш, яхши резюме яратишга бўлган «ҳаракатлар» Энтонини чемпион қилганини ҳалигача айтишади.
Катта бизнесменнинг ўғли отасининг бойликларини совуриш ўрнига, ўз тажрибасига эга бўлиши, таълим олиб, оилавий бизнесни янги босқичга кўтариши жуда катта лойиҳаларга сабаб бўлади. Нолинчи йиллардаги машҳур инглиз промоутери Бэрри Ҳирннинг ўғли Эдвард ҳам шундай қилди.
Олимпидадаги муваффақиятдан бир йил ўтиб Жошуа улар билан шартнома имзолади ва октябрь ойидаёқ илк жангини ўтказди. Кечагина хаваскор боксчи бўлган қаҳрамонимизни саккиз жангнинг ҳаммасида ғалаба қозонган италиялик тажрибали боксчига қарши қўйишди. Энтони Эмануел Леони биринчи раунддаёқ нокаутга учратди ва Лео шундан кейин умуман рингга қайтмади.
Эдвард Ҳирннинг Sky канали билан келишуви бизнес томонидан ажойиб натижаларни олиб келди. Энтони 14-жангидан кейин 1 миллион доллар ишлаб олди. Британия эса, ажойиб классик ҳикояга эга бўлди: яқиндагина тарбияси оғир бўлган, турли жанжаллар туфайли бир неча бор ҳибсга олинган гиёҳванднинг бокс туфайли Британиянинг намунали фуқаросига айланиши албатта, жуда чиройли.
Жошуанинг статистикаси: 21 жанг ва 21 ғалаба. Сўнгги 11 ойда у уч маротаба рингга чиқди ва камида 50 миллион доллар ишлаб олди. Владимир Кличко устидан қозонилган ғалаба унга 21 миллион, Карлос Такам билан жанг 18 миллион, Жозеф Паркерга қарши жанг эса, 18 миллион гонорар олиб келди.
Сўнгги уч жанг стадионларни тўлдирди. Кличкога қарши жанг «Уэмбли»да ташкил қилинди ва чипталар 100 фунтдан 35 000 фунтгача сотилди. Такам ва Паркер билан жанглар Кардиффдаги «Милениум»да бўлиб ўтди ва билетлар нархи 40 фунтдан бошланди. Бу мос равишда 90 минг ва 75 минг томошабин демакдир. Ҳар уччала жанг учун чипталар тўлиқ сотилган.
Паркерга қарши жангга Жошуа А ва J харфлари ёзилган оқ ҳалатда чиқиб келди. Биргина ҳалатда бир нечта логотипларни учратиш мумкин эди. Dafabet букмекерлик контораси, JD Sports либослар савдо тармоғи, AJ Boxing шахсий бренди, яқиндагина Nike билан рақобатни ютиб, Жошуа билан келишувларни сақлаб қолган Under Armour. Бундан ташқари боксчининг Beats by Dre қулоқчинлари, Jaguar Land Rover автомобиллари билан ҳам келишувлари бор. Ўзининг илк мураббийига BMW совға қилган Жошуа пулларни қаерда олганлигини тахмин қилиш қийин эмас.
Ҳомийларни ҳам тушуниш осон. Боксчининг кийими ажойиб реклама воситасидир. Жошуанинг Кличко билан жангини турли пулли трансляциялар орқали 1.2 миллион киши кўрди, 659 000 нафари – АҚШдан. Европалик боксчи учун бу жуда катта рақамлар. Унинг Instagram‘ида фақат профессионал фотолар ва видеолар жойлаштирилади ва миллионлаб кузатув бўладиган бу тармоқ ҳам реклама учун жуда қулай ва фойдали восита.
Ҳар йигирма йилда бир дунёда уч нафар буюк оғир вазнли боксчилар пайдо бўлади ва уларнинг ўзаро қарама-қаршилиги бутун бир даврни, тарихни яратади. Худдики, боксчилар томошабинлар учун урушмаяптилар, балки одамлар уларнинг ўзаро рақобати остида яшамоқдалар...
1971-76 йилларда Муҳаммад Али, Жо Фрейзер ва Жорж Форманларнинг даври бўлганди. 1996-2002 йилларда Майк Тайсон, Эвандер Ҳолифилд ва Леннокс Льюисни кузатдик. Энди ҳаммаси янги учлик учун тайёр. Энтони Жошуа уч камарни (WBA, IBF и WBO) ўзиники қилиб олган ва Деонтей Уайлдер билан жангда тўртинчи – WBC камарини ҳам эгаллашади мумкин.
WBC чемпиони Уайлдер АҚШ шарқидаги Тускалуса шаҳрида истиқомат қилади. Ўз «Ламборжини»си билан пойгаларда қатнашиб турадиган ўзига хос боксчи 40 маротаба жанг ўтказиб, барчасида ғалаба қозонган. Уайлдер Жошуа билан бўлажак жангга тайёргарликни аллақачон бошлаб юборганини сезиш қийин эмас. Масалан, яқинда у твиттерда Жошуага юзланди: «Елкангдаги африкача татуни ўчириб юбор, у ерда жангчилар яшайди. Сен эса британияликсан»
Уайлдер ва Жошуанинг жанги улардан бирини буткул чемпионга айлантириш билан бирга, иштирокчиларга ўнлаб миллион доллар даромад ҳам келтиради.
Бир қараганда, бу суперқарама-қаршилик олдида Александр Поветкин ортиқчадек. Аммо аслида унчаликмас. АҚШлик боксчи бир жанг учун 2 миллион доллар олади, яъни Жошуага нисбатан деярли ўн баробар кам. Демак, ўзаро жангда ҳам Уайлдер пастроқ шартларга рози бўлишига тўғри келади. Бу фактни қабул қилиш ва ўз қарорини бериш учун Уайлдерга вақт керак. Унгача эса, Жошуа бемалол Поветкин билан рингга чиқишга рози бўлиши мумкин. Бунинг устига, ўша Жошуанинг сўнгги жангидан бир соатча олдин рингга кўтарилган Поветкин 75 000 томошабин қаршисида Дэвид Прайс устидан жуда чиройли ғалабага эришганди. Жошуа мухлислари россиялик боксчини жуда яхши эслаб қолганликлари табиий.
Айтмоқчимизки, буюк тўқнашувлар учун икки қаҳрамон топилди, энди учинчисини излаш керак ва Поветкин балки бу ролга мос келиши мумкин. Ҳозирча, амбициялар борасида россиялик боксчи бироз камтар, Кардиффдаги сўнгги ғалабадан сўнг у индамай Уэльсни тарк этди. Бу пойгага шунингдек, кутилмаганда, Владимир Кличко ҳам аралашиб қолиши мумкин, дарвоқе.
«Эрталаб уйғониб, ичимда олов сездим. Мен буни амалга ошира оламан. Энтони, бу расмий огоҳлантириш» – деб ёзди 42 ёшли украиналик боксчи. Балким, буюк учбурчакнинг етишмаётган бурчаги Поветкин эмас, айнан Кличко бўлар? Кутамиз.
Forbes материали асосида Қаҳрамон Асланов тайёрлади
