Жума куни франциялик мураббий Эл-класикода бироз кучсизланган таркибни майдонга тушириши ва у учун мавсумнинг энг муҳим ўйини «Ливерпуль»га қарши финал бўлиши ҳақида хабарлар тарқалиб кетганди. Аммо таркиблар эълон қилинганида, мадридликлар бу ўйинга кутилганидан жиддий ёндошганини билдик.
Албатта, бундай қарорга ҳам ўзига яраша сабаблар бор. Турнир нуқтаи назаридан, «Реал»да «Атлетико»ни қувиб ўтиб ва иккинчи ўринни эгаллаш имконияти бор, айниқса, «Атлетико» ўз майдонида Каталониянинг бошқа жамоасига ютқазиб қўйгач, бу эҳтимол янада ошди. Иккинчидан, финал олдидан салкам бир ой ўйинларга жиддий ёндошмаслик ҳам хавфли, қайсидир маънода, бу ўйинни «Ливерпуль»га қарши ўйинга тайёргарлик босқичи сифатида ҳам қараш мумкин. Учинчидан эса, мавсумни бирорта ҳам мағлубиятсиз ўтказаётган «Барселона»нинг бу сериясига «Камп Ноу»да барҳам бериш жуда ажойиб натижа бўларди.
Хуллас, фақат жароҳатланган Карвахал ва Иско таркибдан четда қолишди. Сўнгги ўйинларда асосий таркибда кўп тушаётган Васкеснинг ҳимоядаги ўрнини Начо, яримҳимоядаги ўрнини эса, Гарет Бэйл эгаллади. «Барселона» эса, ҳамма учун кутилган таркибни туширди, деб айтиш мумкин.
«КОРИДОР»
Ўтган ўйинда «Депортиво» майдонида ғалаба қозонган «Барселона» чемпионликни расмийлаштирди. Испаниядаги анъаналарга кўра, бундай пайтларда, рақиб жамоа икки қатор бўлиб турган ҳолда чемпионларни ўзига хос «коридор» билан кутиб олишади. Ўн йил олдин мамлакат чемпионига айланган «Реал»ни «Сантяго Бернабеу»да худди шу тарзда кутиб олган «Барселона» шу анъанани бошлаб берганди.
Лекин бу сафар «Реал» бундан воз кечди. Бу қарорни меҳмонлар мураббийи Зидан «Барселона» ҳам уларни клублар ўртасидаги жаҳон чемпионати ғолиблигидан кейин «коридор» билан кутиб олишмаганини эслатди. Ўз навбатида каталонияликлар бундай анъананинг клублар ўртасидаги жаҳон чемпионатига алоқаси йўқлигини, чунки у турнирда «Барселона» қатнашмаганини айтишди.
Аниқ ёзилиб қўйилган қоидага асосланмаган бундай ҳолатларда ким ҳақ ёки ноҳақлигини топишнинг иложи йўқ, зеро «Барселона»нинг ўзи Клублар ўртасида чемпион бўлиб, Испанияга қайтганида, бошқа жамоаларнинг мана шундай «коридор»ларидан ўтишган эди. Шунингдек, Валверденинг ўзи январь ойида «Реал»га коридор қилмаслик қарорини очиқлар экан, бундай тадбирлар ўз маъносини йўқотганлигини айтиб ўтганди.
Шундай бўлса-да, «Камп Ноу» шу куни барибир бошқа коридорни томоша қилди. Жамоани ушбу мавсумдан сўнг тарк этаётган «Барселона» ветерани Андрес Иньеста кеча ўзининг охирги Эл-класикосида майдонга тушди. Жамоадошлари Иньестага ўзига хос коридор уюштириб, табриклашди.
РОНАЛДУНИНГ ЖАРОҲАТИ
Роналду «Реал»нинг голини фақат ўзи урмасагина нишонламаслиги мумкин. Лекин мезбонлар дарвозасига урилган жуда чиройли голга у қадар хурсанд бўлмаганидан пайқаш мумкинки, Пике унинг оёғига жуда қаттиқ тепган ва Роналдуни ўша паллада каттароқ хавотир қамраб олгани табиий.
Португалиялик футболчи таймнинг охиригача майдонда қолди ва ҳатто гол уриш учун иккита ажойиб имкониятга эга бўлди, лекин танаффусдан кейин Зидан етакчи футболчисини майдонга туширмади. Жароҳат қанчалик жиддий?
Роналду ўйинни давом эттирганидан жароҳатнинг у даражада оғир эмаслигини фаҳмласа бўлади, катта эҳтимол футболчи жаҳон чемпионатигача ўз формасини тиклаб олиши аниқ. Аммо Mirror тарқатган маълумотга қараганда, ҳужумчи «Ливерпуль»га қарши ўйинда майдонга туша олмаслиги ҳам мумкин. Зидан эса, унинг финалга қадар тайёр бўла олишига ишонмоқда.
УЧГА БЎЛИНГАН ТАЙМ
Иккинчи таймда «Барселона» бир ўйинчи кам бўлиб ўйнаганини эътиборга олсак, жамоаларнинг куч нисбатига фақат биринчи таймга қараб баҳо беришга уринса бўлади. Аммо бу ерда ҳам аниқ бир хулосани олиш қийин.
Дастлабки дақиқалар, «Барселона»нинг тўлиқ устунлигида ўтди ва мезбонлар «Реал»нинг жарима майдони яқинида ҳам осонлик билан бир-бирларига аниқ тўп узатишаётганди. Суареснинг голидан сўнг, «Барселона» ўйинга жуда катта мотивация билан чиққани ва шу бугун «Реал»дан яққол устунлигини намойиш қилишини кутса бўладигандек эди.
Аммо кейинги йигирма дақиқаликда ўйин бутунлай меҳмонлар фойдасига ўзгарди. Зидан шогирдлари ҳисобни тенглаштиришдан ташқари, ҳимоя чизиғини анча олдинроққа силжита олдилар ва энди «Барселона» майдон марказидаёқ таъқибга учрай бошлади. Натижада «Реал» тез-тез, айниқса қанотлардан мезбонлар ҳимоячини безовта қила бошлади – Роналдунинг ўзида камида уч марта қулай вазият бўлганини эътироф этиш мумкин.
Сўнгги беш дақиқа эса, ўша Пеп-Жозе давридаги қонли Эл-класиколарни эслатиб юборди. Футболчилар ўртасида жуда кўп ўйиндан ташқари тўқнашувлар юзага келди ва шу беш дақиқа ичида Рамос, Суарес ва Месси сариқ карточка олган бўлса, Серхио Роберто майдондан четлатилди.
ҲАКАМНИНГ ХАТОЛАРИ
Айтиш мумкинки, ҳакам ўйинни жуда ёмон бошқарди ва анча очиқ, голларга бой ўтиши мумкин бўлган Эл-класикони бузиб қўйди.
Аввалига, 1-таймда Бэйлнинг қўполлигига кўз юмиб, бир дақиқа ўтар ўтмас Серхио Робертонинг четлатилиши «Барселона» мухлисларининг кескин норозилигига сабаб бўлди. Балки, танаффусда бир томон фойдасига хато қарор қабул қилганини тушуниб етдими, хатони бошқа хато билан ёпиш фикри пайдо бўлдими, номаълум, аммо иккинчи таймда Эрнандес бир қатор вазиятларда мезбонлар фойдасига адашганини кўрдик.
Дастлаб, Суареснинг Варанга қилган қўполлигини кўрмай қолди. Айнан ўша ҳужум якунда Мессининг голи билан якунланди ва «Барселона» иккинчи маротаба ҳисобда олдинга чиқиб олди. Кейин эса, Марселога қарши жарима майдони ичкарисида ишлатилган яққол қўполликка эътибор қаратмади.
Бундан ташқари, испаниялик машҳур собиқ ҳакам Гонсалес Итуралде Мессининг ўша голини ҳисобга олмаслик кераклиги ҳақида айтар экан, бошқа вазиятда, Суарес урган голни ҳисоблашни, у ерда офсайд бўлмаганини айтди.
Аммо бизнингча ўша вазиятнинг бошланишида Ракитич офсайдда турганди. Бундан ташқари, ўйин бошида Роналду дарвозабон билан якка-якка чиқиб борган вазиятда ҳам ўйин офсайд туфайли тўхтатилган, аслида бу ерда ҳам баҳсли вазият юзага келганди. Эътиборингизга ҳар икки вазиятни ҳавола қиламиз.
Серхио Робертодан олдин Бэйл четлатилганда ёки «Барселона» ҳимоячиси майдонда қолганда ўйин қандай бўларди? Агар Суарес қоида бузгани учун Мессининг голи ҳисобланилмаганда, «Реал» иккинчи голни урармиди? Агар пенальти белгиланганда ким ғалаба қозонарди?
Очиғи футбол алоҳида эмас, бир бирини тўлдирадиган ва туғдирадиган вазиятлардан ташкил топишини эътиборга олсак, майдондаги ҳар бир воқеа ўйиннинг боришини тубдан ўзгартирди, ҳакам умумий натижага қай томонлама таъсир кўрсатганини ва айнан қайси хато кўпроқ бирор жамоага фойда келтирганини ўлчаш қийин.
Шу туфайли, бошқача қарорларда бўлиши мумкин бўлган оқибат ёки натижа ҳақида қайғурмасдан, кеча биз маза қилиб томоша қилган қарама-қаршилик ва чиройли голлар билан кифояланишга мажбурмиз.
